11月6日，部份時間有陽光，日間天氣仍相當溫暖。上周五公布大非農職位增長放緩，失業率升至近兩年高位，增強市場對加息周期結束預期，利率期貨市場更預期，聯儲局明年6月開始減息，喺2024年會累計減息超過1厘。美股上周錄得今年內最佳單周表現，道指進賬5.07%，標普500指數與納指分別抽高5.85%及6.61%，當晚道指升222點；標指升40點；納指則升184點。市場本周焦點轉放喺與消費意願有較密切關係嘅巨擘如迪士尼等嘅季度業績方面，以確定大市升勢有否持續上揚力度。經濟數據方面，本周比較淡靜，較值得關注係周五嘅密歇根大學消費者情緒指數。市場預期，11月指數初值將為64點，高於前一月的63.8。
美股炒減息，其實息口無法長期高企，主要係當息口長期高於通脹2%時，會打壓需求，加上歐美政府債務沉重，大量國債需要付出龐大利息支出，歐美政府係無法長期承受5%以上高息。只要通脹確認再升穿4%，便會開始減息，呢個亦係市場對利率見頂，明年減息預期嘅背後原因，
美債息回落，美匯指數重返105水平，外幣全面反彈，人民幣回升至7.28-29水平，值得留意雖然港股自3月起一直走弱，但港元一直未有回試7.85，反映港元資金撤資潮已告一段落。不過港股目前最大問題仍然係場內資金面偏弱，港元維持喺7.82水平，未再見資金流走，但銀行結餘保持喺449億元，同樣顯示未見新資金重返，港股仍然係塘水滾塘魚格局，之前跌係陰乾，目前反彈亦係乾升。
有消息指阿里旗下菜鳥正進行非交易路演，有意集資10億美元，目前只有亞洲及中東資金較有興趣，歐美基金反應冷淡，中國故事已唔再係吸引外資嘅必殺技。即管睇睇大型IPO能否吸納中亞資金入場，氣氛上對港股都係有利，重點係要有新資金流入，港元重返7.75強方兌換保證，港股反彈方能長久。
中港股市上周開始反彈，恒指重上17600水平，成交亦回升至900億元，期間升市成交增加，跌市成交減少，都總算係一件好事，港股相對美股是嚴重落後，喺加息及長債息向上風險暫時解除下，美債息及美回落利好港股，好友相信會好好把握機會組織更強勢反彈。恒指上周回升1.5%，連升兩周，科指單周升近3.5%，顯著跑贏恒指，本周反彈料持續。睇返上周五夜期及ADR，以及黑期表現，今日恒指料可高開200點，重返17800水平，並向上挑戰17900至18000區域，周內則挑戰上月高位18290及100日線，約18400至18500水平。即市回吐支持為50日線約17750-80水平，以及上周高位17729，失守回試17600支持，下一較大支持位為20日線17400-17500水平。只要守到呢幾個支持位，縱有短線回吐，後市反彈可持續。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。