港股陰乾格局最難捱
9月19日，大致天晴，但部份地區有煙霞，日間天氣酷熱，天氣乾燥。美股上周五繼續調整，之前美股反彈挾淡倉之際，市場對所有利淡消息無動於衷，上個星期情況折然不同，市場唔單止對利淡消息有晒反應，而且反應仲愈來愈大。三大指數上周五下跌，更創本月低位，走勢更開始反覆向上，標指4000點由支持變為阻力位，睇樣有機會下試3500水平。
仲有兩日就到FOMC議息，債息持續向上，兩年債息升至3.9%，年底息率見4%機會大增，尤其鮑爺已放晒鷹，指為咗控制通脹，難免要經歷加息之痛。呢個時候仲期望明年初或中開始減息，已經變得不切實際。市場期指明年初減息，係認為喺經濟衰退下，通脹自然回落，屆時就可以透過減息刺激經濟。但過去十多年嘅QE，扭曲正常利率，令全球一直處於唔合理嘅超低息環境之中，君不見歐洲經濟已死死下，但通脹仍然高得驚人。
與此同時，聯儲局資產負債表已擴至8.8萬億元，處於通脹時期正好收水，斷估無理由再放水嚟放上加油。萬一經濟急轉直下甚至股災出現，仲邊空間減息放水，所以之前古天后都講咗，期望明年初減息係過份樂觀。
喺美國PCAOB人員今日開始到港審查中概股審計底稿前外，上周五啲中概股喺美國跌定先，今日啲中概股唔慌有運行。人仔跌至七算，A股上周明顯轉弱，不過港股仲喺度爭扎，雖然穿咗19000大關，但暫時仲未下試3月低位，反而周五低位有反彈，港股真係唔知跟邊個市場行，自成一格，相當有性格。咪以為上周五周末前夕有1240億元成交又興奮，其實當日係富時指數Rebalancing，即係追蹤相關指數嘅基金局住買貨而已，只係一堆被動買盤，並無乜資金入場。其實古天后寧願個市一下急殺即V彈，仲有埋成交配合，咁都叫做咗個雙底，好過依家喺萬九水平樓下唔上唔落，成交欠奉，陰乾格局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。