港股隨美股反彈 缺水無成交下仍易跌難升
4月28日，大致多雲，短暫時間有陽光，午間氣溫較溫暖。隔晚美股大反彈，繼微軟同Google公布業績理想，股價回升後，隔晚輪到Facebook母公司META做火車頭，業績後股價急升14%，帶動一眾科網股做好。加上FRC反彈，令市場氣氛好轉，對銀行危機憂慮減退。道指升524點；標指升79點，納指更升近3%，升343點。標指暫守4100，呢個過往嘅阻力，變成短線支持，只要呢個位守到，標指仍有望向上挑戰4300-4400水平。
科網股明顯跑贏大市，之前古天后一直都話要買科網股，就揀美股嘅幾隻巨頭，事實上呢批巨頭除咗蘋果仍未公布業績，其他已公布業績嘅微軟，Google，亞馬遜及META等，全部業績後股價表現都唔錯。暫時美國經濟未有如預期般大幅下行，陷入衰退嘅機會較低，但全年經濟增長唔會有太大本事，加上銀行收緊借貸，未來兩季仍要關注中小型企業會否捱唔住，出現倒閉潮。美股方面，古天后都係傾向買大唔買細，即係盡量避開中小企，寧願揀大型科企，每當股價下調時收集。
至於港股呢邊，成交仍然偏低，暫時仲係一潭死水，雖然內地股市喺月初時，曾以大成交配合反彈，不過月中打後，已無以為繼，唔少股份更加係高位進行派發。港股一度隨A股反彈，不過成交完全唔配合，唔少重磅股更不斷被主要股東趁高減持，令港股喺月中開始下行，至噚日期指結算，恒指已重返二萬大關之下。雖然隔晚美股強力反彈，或帶動今日港股再升，但20000心理關口未必能企穩，而恒指雖然成功守住250日線，但上面嘅10、20及50日線仍遙不可及。
外資趁高套現係不爭事現，無論騰訊(00700)、阿里(09988)、京東(09618)都先後被主要股東，甚至係自己老闆減持，大戶都係趁高搵位減磅套現，咁作為散戶嘅我哋，又何必咁勇對著幹，走去接主要股東沽出嚟嘅貨。暫時港股仍然係有波幅，冇升幅，一日未能解決缺水問題，港股都係瓜多過菜。留意最後防線250日線，一旦反彈後再失守，大市下穿19400水平，即係1月低位，再向下尋底機會大。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。