港股雖強但現貨呈超買 現價追入值博率低
12月6日，大致多雲，早晚清涼，下午部份時間有陽光，天氣乾燥。雖然鮑爺開始轉口風放鴿，但多間大行不約而同唱淡美股，令隔晚美股全線向下，道指跌482點；標指跟納指分別跌72點及221點，標指繼續喺3900至4100整固，留意美股近日升市成交減少，跌市成交增加，雖然對後市仍樂觀，但都要小心謹慎。
暫時主導美股仍然係息口走勢，而息口升跌主要睇通脹，影響美國通脹嘅主要係核心商品價格，包括油價及資源價格，第二項係住屋服務如租金支出等，第三項就係住屋以外嘅支出。目前油價已較高位回落，並已從CPI數據中反映，而住屋支出一向有所滯後，不過美國房價過去5個月已從高位開始回吐，應該好快會喺CPI數據中反映。至於非住屋支出一向較難估計，主要係民眾嘅收入決定，不過從強勁嘅就業市場嚟睇，薪金收入未有減少，即係零售消費仍然強勁，不過呢一部份一向影響CPI最少，只要第一同第二項數字下降，CPI回落嘅速度自然會加快。只要CPI持續回落，美息亦無再向上嘅條件，咁暫時對美股後市可以繼續樂觀嘅，只係留意成交要審慎少少。
至於港股暫時仍然炒緊內地放寛防疫措施，雖然夜期跟ADR隔晚隨美股回落，但短線能守住19200點，後市仍有條件再上，只係已經急升咗咁多，再加上現貨超買，短期再大力抽升力度有限，目前追貨已乏值博率，相反有貨喺手可以逐步減貨，需記得食魚嘅時候，魚頭魚尾通常都食唔晒，食得到個魚身，即係17000上嚟19000呢一截，已經相當滿足。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。