港股難吸引長線資金入市 有波幅 冇升幅
3月10日，天晴乾燥，局部地區能見度較底，日間相當溫暖。美股隔晩高開，不過有加密貨幣金融機構倒閉，市場擔心拖累與其有往來嘅銀行，引發金融危機，銀行及保險股急跌，道指亦由升轉跌。收市三大指數挫逾1%，道指跌543點；標指跟納指分別跌73點及237點。標指之前升至4100阻力之前，喺4078已掉頭，如今再跌至3900支持位附近，因為隔晚有加密貨幣金融機構出事，有機會波及其他金融機構，要小心提防，加上標指已跌至3900支持位附近，而道指更失守33000橫行區底部，走勢有機變得更差。而因為有加密貨幣銀行出事，加密貨幣亦遭拋售，資金避險情緒大幅升溫，一旦今晚非農數據表現強勁，令美債息及美匯指數進一步向上，美股就瓜多過菜。
睇返港股呢邊，走勢更為惡劣，港股自2月份開始出現調整，至3月初反彈，但周二出現穿頭破腳嘅利淡走勢後急轉直下，加上美匯強勁，美股下跌，令港股跌勢進一步加劇。港股一直存在資金不足問題，即使周二早段大市曾高見21000水平，但全日成交亦唔到1600億元，可見根本入場資金唔積極，無資金配合下，加上21000水平反引嚟大量短炒沽盤食糊，當日午後大市已由升轉跌，20日線跟50日線得而復失，升勢曇花一現，可憐高追嘅資金又被鎖死。
呢啲情況其實喺舊年一直出現，一買就鎖死資金，已令到市場資金乾晒塘，而阿爺雖然喺1月及2月都積極放水，但大部份嘅債仔，只係拎咗條新債去冚舊債，即係銀行放嘅水，又喺流返入銀行，並未有流入股市或個經濟體系內，反而銀行嘅負債表就大幅增加，其實呢個缺水問題，就係令中港股市易跌難升嘅原因。
過往北水係一路買貨一路坐上去，又或者愈跌愈溝貨，坐到街貨乾塘為止，但近呢兩年，北水已改變作風，比炒鬼更愛短炒，炒作時間愈嚟愈短，今日買貨明日沽，甚至係上午買貨，下晝已調轉槍頭。咁嘅情況下，就算港股已跌至一個合理，甚至抵買嘅水平，亦吸引唔到資金肯買貨坐定定，個個都係走得快，好世界，如此一來，港股亦只會有波幅，冇升幅。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。