12月4日，大致多雲，早上有一兩陣微雨，局部地區能見度較低，下午部份時間天色明朗。上週五即使鮑爺口吻偏鷹，繼續話「必要時」會再加息，但無助市場改變息口已見頂，最快明年會減息嘅睇法。喺減息預期下，道指再升294點，標指升26點，納指升78點。標指升至4594接近年內新高，距離歷史高位不足5%，即使尚未開始減息，而美股估值唔平嘅情況下，美股照升可也，加上比特幣升至4萬美元，可見資金對風險資產承受能力相當強。
Tesla升至250美元遇阻力，短期或需要時間進行整固，雖然近日多地均有加價的利好消息，但面對中國眾多新電動車競爭對手，Tesla未來好難再擴大市佔率，加上估值又唔平，睇佢個款要喺200美元至250美元之間上落。至於現金流較穩定嘅蘋果公司，雖然iPhone 15銷售未達預期，但勝在夠穩健，強勢蘋果有機會成為美股12月份火車頭。至於2023年熱炒嘅AI概念，12月份資金開始由呢個強勢板塊分流至其他落後板塊，尤其見零售股資金流入相當明顯。好似Macy百貨自11月中開始，由10.5美元升至17.13美元，升幅調達70%，Target由104美元升至134美元，Nike由88美元升至113美元。
本週三及週五分別有小非農及大非農數據，喺就業市場持續降溫下，新增職位會持續向下，通脹繼續受控，利好股市。最值得留意係薪金增長，過去數月已從年初的4.68%，降至4.1%，職位空缺少於1千萬份情況下，自動離職人數持續下跌，員工加薪加價能力正在減弱，例如上半年相當缺人手嘅行業如餐飲、酒店，近月均出現放緩招聘，咁嘅情況下，都唔需要加薪搶人。明年減息4次機會很高，最快第二季便開始第一次減息，大行平均睇明年會減息5次，近日更有大行指最快明年3月開始減息。
貨幣緊縮潮告一段落，美元轉弱，環球經濟有一定程度復甦，而環球經濟超前指標嘅銅價，由10月底以嚟持續回升，另一經濟指標性波羅的海乾散貨指數(BDI)喺11月更勁升一倍，踏入12月首個交易日單日再升近一成，創2022年5月以來新高。美股近日持續向上，因為幾個主要因素，包括感恩節消費強勁、10年期債息跌至4.2厘低位、油價回落，即通脹溫和兼且經濟平穩，呢個正正係近日所講嘅「金髮女孩」情景。
全球風險資產價格大漲嘅同時，恒指上周卻再創一年新低，港股一向被喻為「提款機」，不過今次係環球市場向好，大戶無需提款下，資金捨棄欠缺表現嘅港股，寧取有較好表現嘅其他市場，一日外資唔重返，港股都係無運行。短期恒指仍然低處末算低，下破萬七關後退守16800至16500區域，估計今日初步支持為16700，亦為牛證重貨區，反彈阻力為上周五高位17038點。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。