港股高位震盪靜待調整機會
12月9日，天晴，早晚清涼，日間天氣乾燥，雖然呢啲天氣一啲都唔似冬天，但係令人舒服嘅。下周美國聯儲局議息，隔晚嘅就業數據顯示勞動力市場未有過熱，就業市場平穩，聯儲局喺咁嘅情況下，無需要大大力加息。喺加息壓力舒緩下，美股終止幾日跌勢回升。道指隔晚升183點；標指仍守3900水平，隔晚終止五連跌，升29點；納指回升123點，保住11000大關。預期下周議息加息0.5%已無懸念，目前10年美債息已回落至3.4%，反映聯儲局放緩加息之餘，甚至已有人預估明年下半年或第四季，美息可能掉頭減返轉頭。市場正關注聯儲局嘅議息聲明，會否開始放鴿，暗示貨幣政策或由緊轉鬆。楓葉國剛議息，雖然一如預期加息，但已開始轉口風，暗示可能暫停加息。
美聯儲局今年博命加息，主要係壓抑急速上升嘅通脹，最近反映通脹嘅數據，反映通脹有機會見頂回落，而今晚將公布PPI，預期對CPI走勢有一定指標。美股後市如何，除咗要留意通脹之外，會否陷入經濟衰退，形成滯脹有重大關係。但從美國嘅經濟反映，美國經濟未有陷入衰退危機，反而喺通脹受控下，經濟可以軟著陸，美股自然死唔去。
今年第一季俄烏爆發戰爭，令油價急升；而內地實施嚴厲防疫政策，亦影響到供應鏈，自然刺激物價急漲，加上當時市場熱錢過剩，令資金瘋狂炒作商品，進一步加速通脹上升。但經過聯儲局收緊銀根，除加息外亦同時縮表，減少熱錢流動，美股經過一輪調整後，去泡沫化及去槓桿化，令市場回復正常，股份回復正常估值，自然會吸引再線資金再度入場。
至於港股周三出現高位千跌後，噚日並未見跌勢延續，反而收復上日大部份失地，並從上19400水平之上，未有再向下測試10日或100日線，港股強勢可見一班。至於成交方面，維持喺1500億之上，反映仍有資金願現喺現水平買貨，港股仍有望向上挑戰20000大關。不過喺19000水平之上再追貨嘅值博率已大減，目前有貨喺手仍可持有，至於無貨追貨，隨時要有心理準備高位出現震盪，捱唔起可能出現5%至10%嘅波幅，都係畀少少耐性等機會，12月年結過後，1月基金要再做配置，待調整出現再入場亦未遲。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。