滙控分拆亞洲業務可製造多贏局面
8月19日，短暫時間有陽光，間中有驟雨，稍後有幾陣雷暴。美國就業數據好過預期，聯儲局有官員出嚟放鷹。不過美股早段腳軟一下，其後慢慢回升，三指數均倒升收市。美股暫時仍然喺高位整固，暫時消息層面上，無乜消息令個市大升或大跌，資金從重磅股開始轉向炒股仔，炒到呢批股仔，又要留意音樂椅遊戲幾時音樂會停落嚟。
至於港股繼續死死下，人家美股咩環境就唔使講，就連A股成交兩成夾理都過萬億元，只有港股成交額繼續處於千億元之下，北水嘅參與度更愈嚟愈低。當A股更為吸引，北水亦唔再留戀港股。
呢排唔知大家有冇見到喺滙豐總行前面，總有架流動廣告車行嚟行去，而廣告車上清清楚楚見到有關滙控分拆嘅訴求，係小股東嘅心聲。滙控(00005)喺月初派咗中期成績表，上半年列賬基準除稅前利潤按年跌15%至91.76億美元，純利按年升14%至82.89億美元，中期息每股9美仙。集團第二季度盈利表現遠高於市場預期，主要係受惠遠勝預期嘅收入表現，以及少於預期嘅成本及好過預期嘅信貸質素。不過市場仍然關心有關分拆亞洲業務嘅建議，而集團管理層卻以重重挑戰而拒絕方案，又對分拆後的效益卻鮮有提及，相反市場對有關困難提出了正面解決見解。
再者，滙控投資者對滙豐分拆一事一直有強烈訴求，股東除咗要求分拆亞洲業務及將總部遷至香港，並表達股東希望繼續派息嘅意願。其實滙豐作爲香港最多人使用及深受個人及企業客戶認同嘅銀行，喺香港上市絕對受歡迎，對香港金融中心地位更有提升作用。而亞洲市場一直係滙豐控股最大利潤支柱，剝離其餘業務可以令滙豐控股有更好嘅業績及估值表現。
此外，有報道指，滙控喺香港嘅零售投資者擁有該行約三分一股份，係具有影響力嘅群體，而前年滙控曾取消派息，引起好多以滙控股息作為重要收入嘅香港股東憤怒，及後去年雖恢復股息，但派息政策能否持續執行仍然係股東關心嘅重點。
另有分析指建立一個獨立而喺亞洲嘅上市實體，將更加符合亞洲投資者利益。一方面，可以擺脫亞洲市場被其他市場“拖後腿”，有利估值提升；另一方面，分拆後滙豐亞洲會有更自主權，可以避免此前因英國監管影響中斷派息。如果可以成功分拆，有利滙豐改善經營業績、提升公司價值，並滿足到小股東持續派息嘅要求，絕對係一個多贏局面，其實滙控嘅管理層，真係要好好考慮。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。