為保平安應對監管 內企紛紛課金勢損收入
8月9月3日，大致天晴，但局部地區有驟雨，日間天氣酷熱。美國今晚公布非農數據，有助判斷聯儲局未來嘅貨幣政策路徑。不過其他經濟數據表現理想，美股周四做好，標指跟納指第N次創收市新高，道指亦升131點。理想數據反映經濟復甦積極，但同時支持聯儲局縮減買債規模，支持收水。暫時美股投資者似乎已接受聯儲局隨時收水，市場樂觀情緒持續。美股強勁表現令淡友大跌眼鏡，有華爾街大淡友承認睇錯市，唔單止低估咗美企盈利能力，亦錯誤判斷投資者喺聯儲局貨幣刺激下追逐風險資產嘅意願。不過聯儲局已準備減購資產，經濟增長亦見放緩，投資者要為跌市作好準備，睇嚟淡友口話認錯，但維持標指今年預測3800點，實際未肯屈服。港股呢邊反彈厔二萬六水平又開始遇阻力，無啦啦北京又話要整多個交易所，主要係要扶持中小企，為中小企提供另一個集資渠道。不過市場似乎認為北京交易所設立，主要係深化新三板改革，應該威脅唔到深滬交易所，亦唔會對港交所(00388)構成任何影響。講真一句，廿年前上交所已訂下目標，而超越港交所，上海更立意取代本港國際金融中心地位，廿年過去，上交所都只係維持其為內地企業集資嘅身份，未能代替港交所成為內地企業走出去嘅平台。至於阿爺亦於兩年前表示要喺澳門打造另一個交易所，至今亦只聞樓梯響，澳交所暫時影都未見。
另一單吸引古天后眼球嘅新聞，當然係最先被監管風暴重創嘅阿里巴巴(09988)，宣布啟動「助力共同富裕10大行動」，將於2025年前累計豪擲1000億元人民幣。作為今次整頓潮風眼被重擊嘅阿里，早前已向商家慷慨解囊後，家下再豪擲千億元共襄善舉，惹全城熱議。以阿里今年截至6月底止財季收入約2057.4億元人民幣計，助力共同富裕行動所涉資金規模等於同季收入接斤五成。內地企業為保平安，似乎只有配合阿爺嘅共富計劃，乖乖課金。不過內地監管風暴會否隨住企業自動自覺課金捐獻而告二段落，暫時言之尚早，而中央財辦副主任韓文秀上周星期雖然話「不搞殺富濟貧」，但就明言反壟斷跟反不正當競爭係常態化工作，換句話講監管只會沒完沒了，暫時睇唔到盡頭。至怕係內地追求收入平等，實行「共同富裕」嘅過程中，過度干預或侵害市場經濟，咁就未見共同富裕先陷入共同貧窮。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。