物管新股未掀熱潮 反而提供收集機會
6月25日，大致多雲，有幾陣驟雨，初時局部地區有雷暴，日間短暫時間有陽光。美國經濟數理想，而白宮披露兩黨支持逾萬億基建方案，利好市場氣氛，美股隔晚全面向上。標指跟納指再創收市新高，分別升24點及97點；道指則升322點。近期科技股表現出色，睇嚟下一季股市前景形勢仍然好，大型科技股表現普遍唔錯。
至於港股呢邊仲有幾日就係七‧一回歸紀念日嘅同時，仲係黨慶大日子，點計條數股市都應該會做返好啲，即使恒指喺29500點阻力甚大，即使未能向上突破，都要做好維穩，按道理唔會插落去。而恒指喺28200至29500呢個區間行咗一段時間，隨時喺七翻身之月，再借七，一呢啲特別日子而向上突破都唔出奇。
有消息指騰訊(00700)好快會被落實巨額罰款百億元人仔，涉資近800億港元，困擾咗騰訊一段時間嘅反壟斷調查，或能隨罰款埋單而告一段落。睇返阿里(09988)跟美團(03690)都係被款後，股價反而回穩，睇嚟騰訊亦好快經歷完黑暗見光明。而騰訊近日一直喺近幾個月低位徘徊，甚至喺配股價595元之下，只要罰款落實，唔排除有機會翻身，即管拭目以待。
新股活動再度活躍，單係物管股都有幾隻IPO，繼噚日截止招股嘅中駿商管(00606)之外，越秀服務(06626)亦已順利完成招股，IPO部份錄得9.88倍招額，認購反應唔算太熱烈，正因為呢個原因，以下限4.88港元定價，下周一首掛。奇怪係近日唔少物管股都見落鑊，噚日古天后推介過嘅華潤萬象(01209)更創新高，但新股無論中駿商管跟越秀服務IPO卻未能掀起熱潮，確有啲耐人尋味。
睇返越秀服務嘅基石投資者陣容，其實相當夠睇頭，包括新華資產管理、嘉信金融集團、金蝶、商湯科技、升輝控股、深圳凱爾漢湘實業、華科資本及尚慧企業在内10家機構及個人投資者。除咗基石投資者陣容強勁，本身股東有三大國企越秀集團、越秀地產及廣州地鐵。喺住宅物業管理、專業化商業運營服務及TOD綜合物業管理三大領域，已經具備先發優勢。再睇返公司業務喺物管公司之中，亦有一定獨特性，越秀服務係中國物管行業中為數唔多嘅TOD綜合物業管理公司，亦係粵港澳大灣區提供綜合物業管理服務主要市場參與者。
根據招股書資料，越秀服務財務表現亦甚為亮麗。公司截至 2020 年 12 月 31 日止年度收入達人民幣11.68 億元，按年增約三成，其中人民幣 8.11 億元來自非商業物業管理及增值服務，人民幣 3.57 億元來自商業物業管理及運營服務；截至 2020 年 12 月 31 日止年度年內純利約為人民幣 2.04 億元，按年增 1.19 倍，若與 2018年相比更加大增逾 3.31 倍。集團淨利潤率由截至 2018 年的 6.2%，大幅增加至2020 年的 17.4%，整體毛利率則由 2018 年的 25.9%上升至 2020 年的 34.5%，兩者均領先物業服務百强企業的平均表現。
由於越秀服務IPO唔算熱賣，估計今日暗盤跟下周一首掛，股價表現唔會太突出，但睇返越秀系往績都係穩穩陣陣，細水長流嗰種style，不妨留意搵位收集，作為中長線投資，應該有唔錯回報。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。