8月11日，大致多雲，間中有驟雨及狂風雷暴。隔晚美國公布CPI，升幅少於預期，美股全面高開，三大指數升逾1%，不過有聯儲局委員指CPI雖然偏向溫和，但仍支持加息去繼續壓抑通脹，重申通脹目標係2%。美股應聲由高位回落，但三大指數維持上升，道指升52點，標指僅升1點，納指升幅亦縮水至不足16點。雖然標指已逼近4450首個支持，幸好VIX未見急升，維持喺17樓下，收報15.85，仍然安全，市場未見恐慌，只係美股現價估值已經唔平，就算暫時未見較大幅調回調，都只會喺現水平橫行。
7月CPI升3.2%，好於預期嘅3.3%，但高於6月嘅3.0%，由於CPI去年6月升幅達到9.1%，基數偏高下，今年6月同比計算方法下才會出現3%嘅低增速，但去年7月高基數回落，同比計算方法自然會出現回升，估計8月有機會回升至3.7%水平。值得留意係美國房價正開始回升，估計3個月後房租價亦會回升，由於房租佔CPI比高達42%，10月後CPI或加速回升，呢個亦係聯儲局堅持今年唔減息嘅主要原因。至於利率市場看法不變，今年仍保持5.25%唔再加息，明年首季度開始減息，全年推算減息1.25%。
業績期已屆尾聲，資金由早前炒大價股，上月已開始流向細價股，近日變本加厲開始炒迷因股，WeWork週三宣佈有機會破產，股價大跌38%，唔少空軍加入追沽，結果引來WBS吹雞挾空倉，週四大量散戶買入Call option賭挾沽空，成交量較put option高出100倍，散戶湧入令股價一度狂升147%。不過呢種如同賭博嘅方式炒法，相當危險，反映美股有部份散戶已變得唔理性。
阿里(09988)噚日收市後公布業績，業績表現好過預期，隔晚股價喺ADR一度高見紅底，但未能企穩，更帶動夜期一度高見19500水平。不過美股其後走軟，中概股高開低走，結果夜期由500高位回落，幾乎打回原形，去返日期收市價附近。今日預期大市將跟隨巴巴高開，但古天后唔多相信巴巴可以帶領港股今日高開高走，尤其見到噚晚夜期回落嘅表現，更愈發認為今日嘅走勢係高開低走。留意雖然周三及周四港股日線圖出咗陽燭似要回升，但過去兩日均未重返周二大陰燭嘅頂部19370，若然今日彈到19370前無功而還，基本上又係淡友進擊嘅時候。如果再失守全部平均線，大市有機會下試18960回補裂口，裂口回補後未能重返19000水平企穩，睇怕大市或繼續向下尋底。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。