留意互聯網券商監管會否拖累大市
10月29日，大致天晴，晚上多雲有一兩陣驟雨，間中都幾好風。美股稍為抖一日氣咁大把又發力，道指隔晚升239點；標指跟納指齊創收市新高，分別升44點及212點。
家下已有四成標指成份股公布咗季績，其中超過八成嘅業績好過預期，而標指公司第三季度利潤預計將增長37.6%，盈利支持美股高企。喺9月跟10月初市場一度出現悲觀預期，因為擔心通脹演變為滯脹，結果美企財報表現較市場預期更為健康。
至於隔晚美股焦點，其中一個當然係中概券商股暴跌，人民銀行批評跨境互聯網券商屬非法金融活動，富途跟老虎證券均跌逾一成，即使呢啲券商出嚟澄清公司並非無牌經營，均擁有美股或港股監管機構所發牌照，不過呢啲券商喺內地當然係無牌，阿爺針對係無中境內牌照，但喺境外從事相關金融活動實屬非法金融活動，實係阿爺話你無牌駕駛，你就係無牌駕駛，話之你喺其他市場攞咗牌。人行開得聲，即係阿爺要監管互聯網券商，口痕友話講到底都係為錢，只要乖乖繳款拎返個內地牌照，咪畀你繼續經營囉。
值得留意係呢類券商可以透過手機app開戶，內地股民可以直接喺自己嘅內地銀行賬戶轉賬至券商戶口進行交易，變相內地人可以透過券商戶口轉走資金，呢一點正正捉到阿爺痛處，搞不好演變為非法走資，難怪阿要出招做嘢。呢單嘢發展如何，暫仍屬未知數，但不能掉以輕心，皆因阿爺一動真氣，要封殺券商所有內地客戶嘅戶口交易，對券商本身，甚至整體大市都會有負面影響。
另一個焦點係Facebook易名Meta，新名稱能更能反映未來公司業務及發展。口痕友就話面書易名變面癱，真係大吉利是。公司解釋元宇宙係公司下一個發展前景，公司會以元宇宙為先，而唔係Facebook優先。「元宇宙」(Metaverse)由Meta(超越)加上Universe(宇宙)兩部分組成，可理解為一個平行於現實世界的虛擬世界。
公司同時表示，將獨立分開旗下「Facebook Reality Labs」(Facebook實境實驗室)嘅業務作財務匯報。Facebook Reality Labs將包括擴增現實(AR)和虛擬現實(VR)硬件、軟件及內容。公司表示，對這個新部門嘅投資可能會令2021年的嘅營業利潤減少100億美元。有人推測公司咁做，唔排除未來有分拆行動，將Facebook拆獨立上市，不過呢啲都係純粹推測。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。