病毒收水 殺傷力或不及中美關係惡化大
12月2日，天晴，天氣非常乾燥，早晚清涼。隔晚美股早段彈得好地地，道指更一度升逾500點，但加州發現美國首宗變種病毒Omicron病例，市場憂慮疫情升溫，全球經濟復甦再添疑慮，美股急轉直下，三大指數直插至全日低位收市，道指跌461點；標指跟納指分別跌53點及283點。 喺疫情再度升溫下，聯儲局不單止唔延緩收水，鮑爺重申因為所有預測顯示通脹將於明年下半年緩和，強調將使用政策工具確保通脹唔會根深蒂固。鮑爺對收水抱開放態度，仲話縮減買債計劃唔一定對市場造成破壞性影響，重申聯儲局考慮加快縮減行動係適合嘅。而市場嘅表現就反映市場對收水嘅恐慌似乎仲大於變種病毒。 不過美股大好友強調，喺目前美股估值偏高下，而聯儲局又提早收水影響下，美股難逃一次大調整，調整幅度可能出現10至15%調整，但都係短暫回調，對美股保持樂觀睇法，調整後美股可重拾升勢，明年底標指目標可達5500點。 美股本身強勢，古天后亦相信變種病毒Omicron雖然傳染力較強，但殺傷力大減，大市借病毒消息調整唔係大件事，反而港股本身疫弱，再加上缺乏資金流入，稍有利淡消息，都成為淡友質低股市嘅藉口。不過無論變種病毒又或聯儲局提早收水都好，亦唔及中美關係遲遲未能緩和殺傷力大。 自中美兩國元首視像會議後，兩國關係未見改善，拜登再列12間中為涉軍黑名單，中國當然不甘示弱，最近消息係指當局擬禁止科企透過離岸公司赴海外上市，雖然官方稱不屬實，但沒有詳述。雖然未有講到明唔畀中資企業赴美上市，但阿爺向來做嘢都係先放風，後行動，傳得咁嘅消息，遲早都會成事實。 若然呢個消息落實，港股冷手執個熱煎堆，可能反而有着數，只係目前港股估值低迷，若然侷限只可以喺香港上市，唔准以較高估值去美國上市，對中企嚟講亦未必好事。中美之爭持續，古天后最擔心係最終演變為中美全面脫鈎，又或者全面開始，而最終嘅輸家將會係全球商界，屆時真‧攬炒，大家齊齊食樹皮，要有心理準備，若然中美關係僵持落去，明年將迎來更難捱一年。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。