監管持續下 科網股勿急撈貨
8月31，短暫時間有陽光，漸轉多雲有雨，稍後驟雨增加及有雷暴。市場對聯儲局收水疑慮減退，美股隔晚個別發展，標指跟納指再創新高，道指則跌55點。至於港股仍然呆滯，雖然噚日喺期結日重上10日線(25467)，但由7月初形成嘅降形態未變，有機會繼續向下尋底，暫時防線喺24500點。不過內地監管風暴持續，噚日又再向遊戲業開刀，限制未成年玩家打機時間，阿爺開到口，啲家長除咗多謝晒之外，都無乜好講。除咗嚴控打機時間之外，內地政府高層再發炮，話要加強反壟斷。監管沒完沒了，短期科技股繼續無運行，就算估值再平，家下都未係撈科網股嘅時候，既然如此，不如講下股市以外嘅嘢好過。恒地啟德新盤位置具優勢聯儲局鮑爺喺Jackson Hole會上放鴿，即係低息環境仲會持續一段時間，難怪本港樓市仍然向好，睇返差估署嘅最新數據，今年7月份私住宅售價指數報396.3，已創近26個月新高。而樓價則連升7個月，累計升4.3%，睇嚟8月份呢個指數要破頂無難度。對於上車一族同投資者嚟講，本港樓價易升難跌，尤其自住嘅，負擔得起真係早買早享受，遲買畀多嚿。上車一族傾向揀新樓，主要因為按揭成數較高，地產商亦會有部份首期貸款幫助上車，咁當然係新盤較吸引。不過買樓幾時都係講位置，揀啱位置緊要過買入時機，而呢期能夠吸引到古天后眼球嘅，非恒地(00012)旗下嘅新盤The Henley莫屬。啟德呢幾年變天，自機場廿年前搬走之後，啟德發展一日千里，屯門線嘅開通，令本身已有地理優勢嘅啟德區更為方便。啟德發展區咁大，其實區內唔同樓盤位置有所不同，The Henley位處啟德城中心南面，對到正將會喺2023年落成啟用嘅體育城，同埋隔離就係明年開幕嘅啟德車站廣場，直接連繫港鐵(00066)啟德站，喺區內嘅地理優勢，並唔係其他啟德樓盤可以相比。不過有老友住啟德區，就話由於區內一直發展緊，要五年內已完完全全完成發展，所以難免要面對沙塵滾滾嘅短期問題，而且住得新樓，單位入伙亦要面對裝修噪音問題。The Henley就貼心照顧用家，呢個盤係全港首次引入嚟自意大利嘅防塵隔音門，部份房門設有下降式門阻，防塵又隔音，咁就唔怕隔離左右或區內建設引起嘅大塵同埋噪音問題。The Henley除咗係香港首個引入防塵隔音門嘅樓盤之外，仲係第一個為部份單位度身訂製多功能衣帽間嘅樓盤，同樣用意大利高級品牌。啟德地區性變天，係一個世界級海濱規劃，而九龍東CBD2愈來愈多國際知名機構進駐，呢一區嘅樓價，只有愈來愈貴，買樓幾時都係以地點作為最先考慮因素，如果呢一刻要揀新盤上車或換樓，啟德應該係首選。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。