監管風暴未完又限電 港股短期難有起色
9月30日，天晴，天氣炎熱，稍後局部地區有驟雨。美股隔晚個別發展，喺債息趨升下，估值高企嘅科技股仍有沽壓，令納指表現反覆，收市再跌34點；道指跟標指分別反彈90及6點。聯儲局暗示最快11月啟動縮減資產購買步伐，市場對「收水」預期升溫，刺激美元強勢，美匯指數處於近11個月高位；；10年期美國國債孳息率則企穩1.5厘以上。大型科技股持續偏軟，只有宣布收購遊戲制作商Night School Studio嘅Netflix升2.6%。
過往曾成功預測2000年及2008年大跌市嘅基金公司GMO創辧人再次警告，美股正處於有史以來最大規模的泡沫之中，而目前嘅泡沫係由美國政府政策人為推動，呢啲政策導致投資者相信資產被高估係合理，不過經濟實際上並未見蓬勃發展，因為生產無實際增長。而呢位星級基金經理直言，今次喺唔同領域出現泡沫係前所未見，包括利率、股票、房地產、非能源大宗商品，而投資者好快要面對資產泡沫爆破，迅速變化嘅資本市場。
至少港股呢邊喺北水缺席下表現反覆，早段因為市場憂慮內地限電影響生產，早段曾嚇窒港股，恒指曾跌逾400點，幸而24000力守，喺金融股支撐，及個別內房及物管股反彈下，收市倒升163點。
噚日嘅跌市主要由內地多個省份進入「用電荒」引起，市傳中央計劃加電費應對，其中考慮先提高工業用電價格，以劃一上調電價或喺煤電聯動框架下調整電費；若上調工業電價後仍未能解決，亦有可能考慮上調居民用電價格。不過，有關計劃仍有待落實。而內地缺電問題，主要係煤炭供不應求，令發電廠虧損壓力急升。
「限電令」反映內地工業生產用電需求超出供應。若然中央續減少用電，電荒有機會喺下季緩解。喺限電及可能加電費下，高耗能企業盈利首當其衝；而新能源板塊有望成為煤電替代能源而受惠。不過「限電令」將拖累內地經濟復甦速度，新經濟行業又持續受到監管措施影響，恒指短期反彈力度有限。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。