禁投令股受政策不明朗困擾避之則吉
1月14日，大致天晴及乾燥，早上天氣寒冷，日間天氣略為回升，呢兩日暖少少，下星期初氣溫又再下跌。下周拜登正式入主白宮前，市場開始觀望美國政局變化，各方嚴陣以待，擔心上周國會山莊暴動案件重演。美股隔晚窄幅上落，道指微跌8點；標指跟納指則維持上升。美國政府公布最新嘅「中國軍方企業」名單，將新增9家中國企業，但中國科技巨頭騰訊(00700) 及阿里巴巴(09988) 不在名單之列，兩股隔晚ADR分別升2%及4.3%。
愈嚟愈多美股好友警告，美國股市及債市短期內可能出現較大幅度回調，原因係聯儲局或可能縮減刺激方案，加上長期利率上升，而目前長期利率正呈現上升趨勢。雖然愈嚟愈多意見指短線美股大幅調整嘅風險增加，但大部份美股分析員及專家，表示即使美股短線出現回調，中長線仍然睇好。
美國放生騰訊及阿里，令市場憧憬拜登上場後，更多中資企業可從被制裁實體清單中移除，不過喺美國有動作之前，管理盈富基金(02800) 嘅道富環球投資管理亞洲(下稱道富)表示，今日開始又恢復對屬於恒生指數成分股公司嘅受制裁實體進行投資，原因係盈富基金及道富都被視為「非美國人士」，理應唔受禁投令影響。道富呢一下彈出彈入，唔單止令市場嘩然，被指「跪低」之餘，亦被金管局批評，即使事件未對盈富基金嘅投資者構成實質影響，但已對市場造成「不必要的混亂」。
截至上周五(8日)，被列入該黑名單嘅藍籌股包括國營電訊商中國移動(00941)及中國聯通(00762) 股價及相關新聞 ，以及油氣項目遍布歐美嘅中海油(00883)。盈富若然唔買呢幾隻大藍籌，自然無法追貼恒指表現，有違盈富基金設立原意。道富雖然未有直接回應今次「轉軚」係受到政府壓力，不過港府喺周二表示金管局對盈富監督委員會嘅人事任命仍有少許剩餘影響力，已一語道破道富有否於當局施壓而話唔買又買。
其實盈富基金一旦未能追貼恒指，某程道上會令損害市場對產品信心，不過缸邊友咪自作多情，以為道富轉軚，其他指數基金會有樣學樣，皆因美資基金公司唔單止係被視為美國人士，而富時羅素跟MSCI明晟從旗下指數剔除相關禁投股，追蹤相關指數嘅基金自然跟隨指數變化行事，盈富回心轉意，唔代表美資基金會反手掃貨。既然喺政策風險下，相關禁投股仍受不明朗因素所困擾，古天后就認為避之則吉，反正市場熱炒股份多的事，基於不立危牆下嘅大原則，又何必偏向虎山行。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。