科技股喺政策影響下舉步為艱
4月16日，多雲有雨，有時驟雨較為頻密，風勢清勁。隔晚美國經濟數據表現理想，企業派成績表亦有好成績，利好市場氣氛，美股表現強勁，道指跟標指齊創收市新高，道指升305點、標指升45點，道指更首次報收34000點水平，納指亦升180點。美債息回落，科技股再受資金歡迎，主要係10年期美債孳息回落至一個月低位，報1.55厘。
重磅科技股上漲，蘋果、Facebook、Netflix跟亞馬遜均升逾1%；而金融股業績陸續報捷，均勝市場預期，只係大部份嘅銀行股即使交出亮麗成績表，但業績後股價普遍下跌。而經濟數據反映美國經濟復甦提速，預期下半年經濟增長強勁反彈，隨住消費者需求反彈，將推動通貨膨脹率及利率向上。幸而聯儲局維持貨幣寬鬆政策，鮑爺已多次強調2022年前當局加息無乜可能。
雖然美股接連報捷，但港股卻完全跟唔上美股步伐，主要係港股愈來愈依賴北水支撐，喺內地水緊，市場擔心阿爺收水嘅陰霾下，中港兩地股市一池死水，有波幅，冇升幅，日復日嘅頽勢，令本地缸邊友感到沮喪。雖然近日香港疫情開始受控，但防疫措施卻未見放鬆，餐飲零售業中，尤其係好多非連鎖小店，已陷入無法翻身嘅地步。最近政府透露5月份或放內地客來港嘅防疫措施，但免檢疫措施實行後，疫情會否反彈屬未知數，須知針無兩頭利，外來人流增加，疫情反彈嘅風險亦增加。
非連鎖小店生存空間被呢場世紀疫情扼殺，但連鎖店因為財力雄厚，兼且攞盡政府補貼，汰弱留強下，連鎖店成為今次疫情生還者，甚至贏家，呢個現象喺餐飲業更為顯著。噚晚本地一個連鎖餐廳集團譚仔國際入咗A1，遞交上市申請，集團在港經營「譚仔雲南米線」及「譚仔三哥米線」品牌，喺中國內地及新加坡亦擁有業務，專營米線。對於譚仔大家最熟悉係落單阿姐嘅特色廣東話，睇睇招股書，原來集團截至2020年12月底止9個月止，譚仔國際錄得純利2.31億元，按年升逾30%，可以話係疫市奇葩。
而騰訊(00700)發行美元債券峰迴路轉，本來受華融事件影響，噚日早段市場反應冷淡，幸而其後華融已為償付4月27日到期債券備好資金嘅消息傳出，最終債券全數出售，更錄得超額認購，而債券息率亦較原定嘅低。不過呢個消息未必能夠帶動騰訊走高，畢竟阿爺仍追住平台股嚟打，呢期相關股份只有波幅，難有升幅，除非再有大量北水入場掃貨，否則科技股都係舉步為艱。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。