維持資本市場繁榮穩定已成國家戰略
1月21日，部份時間有陽光，氣溫回升至最高23度，未來兩日天氣繼續和暖。隔晚拜登正式就任總統，市場氣氛保持樂觀，美股三大指數齊創新高，當中納指更升近2%。拜登政府除咗計劃推出1.9萬億美元的刺激方案之外，一口氣簽署17項行政命令，行動提振市場情緒，令投資者情緒更加樂觀。美國政局總算塵埃落定，但疫情尚未受控，加上要扶起經濟並唔容易，只係資本市場維持樂觀，係維持經濟景氣及間接刺激經濟嘅一種手段，估計拜登政府將繼續呢個手段，係利好美股持續向上嘅一個重要原因。美股好，環球股市齊齊好，估計拜登上場後，股市仍有一段蜜月期。
除咗內部問題之外，對外事務尤其中美關係都係拜登需要處埋嘅重點任務，只不過喺內部疫情未穩定嘅情況下，未有時間處理，暫時要放埋一邊，有關制裁中資企業嘅行動將暫停，但新一輪中美貿易談判難望喺本季之內重啟。不過中美關係唔再惡人係好事，已經令中港股市鬆一口氣。
目前能夠支持美中港甚或全球股市繼續向上嘅一個重要因素，係疫情防控方面得到進展。若然喺全球多國開始接種疫苗下，疫情得以受控，焦點可重回經濟復甦，為傳統實體經濟注入活力下，或能為個別傳統股板塊重提動力，而科技股保持升勢，新舊經濟股雙管齊下，股市可保持欣欣向榮之勢，暫時真係咪急於估頂。
支持股市向上嘅另一重要因素，係市場流動性維持充裕，預計喺全球多國仍受疫情困擾下，全球央行會保持寬鬆貨幣政策，不單令股市水頭充足，仍有利新股保持暢旺，支持住全球金融業收益，亦有助加快經濟復甦步伐。而喺全球水浸嘅情況下，銀紙貶值速度加快，逼使資金加快流入各類資產，股市唔升至奇怪。不過更奇怪係總有人日日高呼股災將殺到，北水一走港股末日，古天后當然一笑置之，目前港股成為國家維穩一個重要戰地，維持中港資本市場良好發展係扶持實體經濟嘅手段，內地經濟可持續發展亦係國家重要戰略。
尤其喺美國欲與其他盟友再次恢復關係下，中國極有可能受到被美國及其盟友圍堵嘅威脅，金融改革已成為中國解決債務危機及房產泡沫的重要手段。喺重用資本市場作為重點扶持國家戰略嘅大前題下，香港作為內地境外國際金融中心呢個角色暫未改變，甚至變得更加重要。而互聯互通機制已成立咗好幾年，今年開始真正發揮作用，北水持續湧入已成新常態。古天后都係嗰句，畏高唔敢入場企埋一二邊食花生可以理解，但硬係要逆市操作做淡，必定損手爛腳撞穿頭。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。