缺乏資金流入 港股維持悶局
8月10日，天陰有雨，三號風球仍然懸掛，吹強風，稍後風勢緩和，多雲，間中有狂風大驟及雷暴。美股喺公布CPI前回軟，道指跌58點；標指跟納指分別跌17點及150點。花旗策略師表示，上周公布就業數據出乎意料地強勁，加上工資增長快於預期，令加息預期升溫。報告指出，花旗假設聯儲局喺9月加息0.75厘，如果核心通脹高於預期，加息幅度就算達1厘亦唔出奇。而Ark舵手木頭姐(Cathie Wood)亦表示，美國經濟已陷入衰退，除咗連續兩季國內生產總值(GDP)收縮外，勞工部家庭調查數據亦顯示，過去4個月就業人數一直持平，偶爾甚至會出現下降，而其他各項數據都反映經濟非常疲軟，並估計聯儲局將於明年重新減息。
今晚美國公布7月CPI，係後市經濟指標嘅關鍵，市場預期通脹見頂回落，由6月的9.1%降至7月的8.7%，要睇睇今晚美股對CPI有乜反應。而9月份聯儲局將會加大縮表規至950億美元。經過兩個月溫和縮表後，美國ON RRP仍高達2.18萬億美元，熱錢推升美股反彈，喺熱錢充斥下，通脹難以回落。要睇聯儲局點樣應對通脹高企，而經濟有可能陷入衰退嘅兩難局面。
港股繼續喺20000水平上落，呢兩日成交持續低迷，買賣兩閒，水盡鵝飛。暫時無論外資定係北水，都唔急於買貨，只會等大市回落時，慢慢收集。記得6月份喺半年結效應下，基金入場粉飾櫥窗，但喺再無新嘅資金入場情況下，購買力又已消耗得七七八八，經過7月份回調，8月喺低位徘徊亦未再見有新資金入場，港股自然動彈不得。而喺港美息差擴闊下，港元持續流出，銀行結餘減少至1300億樓下，而港元流出之勢未有停止，資金流走下，港股更難見有資金流入，睇嚟港股仲有一段時間要維持悶局，而呢啲狀況，的而且確會悶走唔少缸邊友，選擇離場。奇怪嘅係呢一班目前離場嘅玩家，往往等到大牛市重臨再重返市場，錯過低位收集，再喺牛三高位高追，一次又一次高追坐艇，再經歷長時間嘅熊市及牛一及牛二悶局後死心，離場，循環不息，一直係市場嘅輸家。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。