缺乏資金流入 港股維持疲弱
8月30日，部份時間有陽光，間中有一兩陣驟雨及雷暴，日間天氣炎熱。美聯儲局鮑爺喺Jackson Hole央行年會表示，美國可能今年喺今年開始縮減買債，但強調減買債唔等於開始加息，佢亦強調通脹只係短暫現象，暫時亦未有加息時間表，主要係美國就業市場雖見復甦，但就業人數仍未到要開始加息嘅水平。市場視鮑爺講為放鴿，美股上周五繼續做好，標指跟納指再創收市新高，道指則指逾200點。
至於港股喺內地連環加強監管科技、教育、醫療等多個行業下，中港兩地股市持續疲弱，港股喺7月未見反身但反般後，8月份僅於上旬時間曾見反彈，可惜資金於7月大舉撤離後，又點會咁快重臨，喺缺乏資金入場下，港股喺8月份再失守7月低位，嚟到8月最後兩個結算日，港股能否重上26000水平成為關鍵，若然繼續走弱，唔排除9月再下探年內低位。睇返過去20年，恒指若然由6月開始連跌3個月，9月份再探底，甚至重挫出現咗四次，唔知今年會唔會發生同樣情況。
不過美股方面對有關收水憂慮似乎對市場影響有限，而鮑爺再放鴿，令美股投資氣氛保持暢旺，只有港股獨弱。而港股走弱，係因為資金流走，主要因為市場憂慮政策風險，尤其係當教育板塊可以因為政策因素暴跌七八成，令外資對中概股重新估值，甚至卻步。龍頭科技股騰訊(00700)現價估值已跌至較2008年金融海嘯時更低水平，反映投資者唔多願意再冒政策風險。
暫時資金流走並對港股嘅中資金信心疲弱嘅情況難以扭轉，古天后已多次表示要避開監管風暴風眼嘅科技股，呢批股份只有波幅，難有升幅，即使短炒博反彈亦要嚴守止蝕，一旦博反彈不似預期，只可以忍痛打靶，要盡量多留現金。至於受惠政策嘅內需、消費、汽車及新能源等板塊，亦只可小注怡情，未宜重倉。
不過目前恒指市帳率只有1倍左右，按過往紀錄，港股跌至1倍市帳率已見中長線吸引力，應離底不遠，即使港股於9月受外圍因素影響，有機會再探底失守前低位，可能要下試23000水平，但估計離底部不遠。若大市再向下探底，跌穿24000水平，或可以分段收集優質股作中長線投資。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。