8月10日，大致多雲，有幾陣驟雨，局部地區有雷暴。喺美國公布CPI前夕，美股隔晚走軟，不過科網股氣氛較差，主要係軟銀有份投資嘅WeWork表示「嚴重懷疑」能否繼續經營，股價大跌38%，孫正義呢項投資又瀨嘢。納指隔晚跌162點，道指跟標指分別跌191點及31點，標指留意4400-4450支持守唔守得住。暫時VIX仍然喺危險水平之下，但要留意一旦升穿17，美股走勢可能又逆轉。
今晚美國將公布7月CPI數據，雖然6月CPI降至3.09，但隨住油價回升至84美元，加上房租回升等因素，CPI喺嚟緊日子有可能出現反彈，呢個亦係FOMC有委員堅持今年之內不能減息，甚至要注意係唔係要再加息嘅主要原因，怕通脹會再度回升，
雖然美國信貸評級被下調，但周三拍賣國債反應卻相當熱烈，拍賣債息率為4.398%，較上月的4.534%更低，認購倍數由2.882%升至2.901%，呢5年以嚟第2高，而海外買家參與度更超過七成，創歷史新高，外圍經濟不景氣，反而美國說好的衰退未來臨，高回報嘅美債仍然不乏捧場客。
至於港股噚日低位回升收市，中概股隔晚借勢反彈，但大部份股份高開低走，甚至倒跌收市。收後，拜登簽署制美資對華的敏感技術投資，包括香港及澳門。呢個制裁消息難免令港股低開，只係中國一向幾要面子，你制裁我，我就反制裁你個制裁，無實際出招都要打嘴炮回應，唔排除今日港股又上演中外大戰，外資沽，中資力托，港股未必會因為呢個消息而大跌。
不過長遠嚟講，港股又進一步中港融合，過往外資肯大量投入港股，係因為香港一向有別於中國其他城市，但如今美國對香港一視同仁，過往優勢消失得無影無踪，咁嘅環境之下，對外資嚟講，港股吸引力大減。加上較早前聯交所更公布，今後所有IPO，唔需要再披露有關中國風險，市場變得更唔透明，外資入場變得無險可守，數都無得計，無數圍仲點同你玩，倒下如放棄港股呢個市場，免得入場後死得不明不白。
阿爺不時話要救經濟，但都係流於打嘴炮，叫口號，但實際具體政策欠奉，聲到錢唔到，基本上係無幫助。港股亦係一片得把口谷經濟嘅聲音之中，由二萬水平再度回落至萬九水平，成交又再縮水至不足一千億。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。