美國制裁及內地監管夾擊 港股只能短炒打游擊
12月17日，部份時間有陽光，晚上氣溫顯著轉涼，呢個周末氣溫繼續下跌。美股隔晚腳軟，科技股跌勢較顯著，納指跌幅又超過2%，跌385點；標指跌41點；道指跌30點。睇返資金流向，近日資金流入防守性較高嘅板塊，好似公用事業及醫療保健等股份，反映市場對未來經濟路徑擔憂仍然存在。
美國財政部正式宣布，將無人機公司大疆等8家中國科技企業，列入禁止投資「中國軍工企業」黑名單，理由係呢啲公司支持以生物特徵辨識方式，監視及追蹤新疆維吾爾人等少數民族。呢堆企業被列入美國商務部嘅出口管制「實體清單」之中。商務部周四亦將中國人民解放軍軍事科學院軍事醫學研究院及其11個研究機構，列入實體清單。
呢個清單並未見任何一間喺香港上市嘅公司，更加無任何生科股，事實勝於雄辯，證明前日生科股高台跳水，實屬虛驚一場。古天后並非馬後炮，急跌當日已叫咗聊天室會員，喺80水平樓下撈生科龍頭藥明生物(02269) ，當日有入場，兩個交易日穩贏一成以上。其實堂堂一隻藍籌股，無啦啦急跌兩成幾，仲要只係一個傳聞，若然傳聞屬實，當日跌幅或足夠反映個負面因素，若然傳聞係流料，咁就必定迎來強勁反彈。再加上藥明斥資40億進行回購，點都對股價有支持，所以噚日80邊再叫可以買貨，結果即日已由低位彈一成。
不過今次呢一役，反映市場信心已薄弱到一個點，只要稍有利淡消息，缸邊友都變成驚弓之鳥，喺中美角力下，再加埋內地監管，港股只可以畀人㩒住嚟打。面對如此市況，短打游擊係上上之策，嗰啲乜嘢中長線策略，月供坐貨暫時用唔着。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。