美國趕絕中概股 港股未必能受惠
12月4日，天晴乾燥，早晚清涼，日夜溫差較大，尤其晚間更覺寒意其濃。隔晚美股個別發展，納指再創收市新高，道指中曾高見30110點，升逾200點。但收市升幅收窄，標指更倒跌2點。大型科技股回軟，不過跌幅又唔算太大。有關疫苗消息持續影響市況，美股升幅收窄主要係輝瑞預計今年肺炎嘅發運劑量將較原計劃減少一半，因為早期生產的原材料不符合標準。其實疫苗成效如何，暫時仍屬未知數，欲速則不達，太過倉促推出疫苗，隨時有反效果。
踏入冬季後疫情仍然嚴峻，美國國會眾議院一姐跟參議院民主黨領發表聯合聲明，表示佢哋國會參議院兩黨部分議員提出嘅9080億美元刺激措施提議，雖然呢個數較之前民主黨提出2億億美元規模相距甚遠，但馬死都要落地行，疫情下美國經濟復甦步伐仍未清晰，推出刺激經濟方案有助舒困。
至於港股ADR跟夜期均見上升，今日大市或有望向上再推一推，但喺未有更多利好消息下，要上破二萬七關又談何容易。加上侵侵宣布將中芯國際(00981) 股價及相關新聞 及中海油(00883) 股價及相關新聞 一同列入黑名單，指兩間公司屬於由解放軍擁有或控制嘅企業。不過呢個消息傳咗幾日，市場都消化得七七八八。
其實都預咗侵侵喺呢個幾月餘下任期內繼續向中國企業趕盡殺絕，周二眾議院更表決通過《外國公司問責法》，呢個法案實施下，有關中概股無法滿足美國監管機構審查財務審計底稿下，可能被逼撤出美股。另一方面，仍未上市嘅中企，亦唔再選擇赴美上市，選擇自己地頭嘅港股作首個集資上市地。
目前喺美國上市嘅中概股市值高達2萬億美元，唔少缸邊友自然聯想到呢批中概股喺美國退市，自然會回歸香港，港股照單全收，港交所(00388) 股價及相關新聞 呢次真係發達喇……，不過幻想美麗，現實卻殘酷，美國要針對中國，又豈會忘記香港已屬中國一部份，尤其香港獨特性不再下，只係一個大灣區內城市，美國出招又點會漏咗香港呢一份。中美雙方交戰，香港夾喺中間當然係捱打，睇睇尋日《外國公司問責法》通過後，未見港交所股價癲升，反映缸邊友都唔係傻。目前港股市場嘅中國風險高度集中，最怕係美國針對埋中概股嘅逃生門即係港股。香港國際金融中心地位係由國際endorse嘅，並唔係自己說了算，任何時候都要提高警覺，留意嚟緊呢一個月時間，侵侵會如何出招，一旦再大規模制裁香港，港股屆時有得震，冇得瞓。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。