美國銀行風暴養肥空軍繼續行兇
5月5日，大致天晴，日間天氣炎熱，市區氣溫超過31度。美國地區銀行風愈搞愈大鑊，FRC爆煲後，市場都揣測下一間地區銀行到邊間爆鑊，中小型銀行股插水，拖累市場氛氛，三大指數下跌，道指跌286點；標指跌29點；納指跌58點。FRC爆煲獲JP接手後，風眼目前轉移至PACW，其股價喺短短7日內跌逾七成，其沽空比例達到兩成，之前古天后都講過，一日唔阻止空軍玩沽空，空軍就會出嚟空襲，因為政府已表態只救存戶，唔救銀行股東，話之你銀行存款流失，當地方銀行存款流失，自然引起短暫流動性問題，空軍就會借題發揮，將股價推低，繼而獲利。
其實自3月份美國發生銀行風暴以嚟，唔少中小型銀行已尋求合併，以順利過渡風暴，不過空軍死咬住唔放，令呢批銀行股股價大跌，往往令收購合併遇到障礙。本來加拿大嘅TD Bank打算以每股25美元收購FHN，岩料喺銀行風暴過程中，銀行股股價急跌，最終TD放棄收購，引發後者股價大跌50%，大大增加市場恐慌情緒。
其實自2008年美國引發全球金融海嘯，死咗間雷曼後，政府一直嚴格規管銀行，只係2020年因為疫情關係，聯儲局又放大QE，市場游資大增，令銀行存款大幅增加，為咗賺取更大回報，唔少中小型銀行買入大量國債，其實息口未有大幅上調，債價未有大跌，呢啲國債就唔會出現浮盈。可惜去年中後，聯儲局收水，債價大跌，本來銀行只係帳面損失，係唔需要低位沽債嚟套現，但3月份SVB爆煲引發擠提，令銀行局住低位沽債套現應付，債券嘅浮盈就變成實現虧損，引嚟空軍有機可乘。
至於港股未受美股影響，北水回歸後反彈，全靠北水力掃內銀跟內險股，帶動指數回升250日線，睇嚟國家隊係想將港股穩住喺20000水平附近。不過成交額只有1052億元，只有北水唱獨腳戲，無新資金流入，唔同板塊輪流炒上，科網股已成功割韭菜，家下掃高金融股，家陣追貨，小心做完科網韭菜，又做金融韭菜。古天后維持港股有波幅，冇升幅嘅睇法不變，除非有大成交即係平均每日1500至1700億配合，兼重上20400水平收復全部平均線企穩，否則港股仍未能扭轉目前局面。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。