美股升勢過度集中 提防走勢突然逆轉
5月23日，多雲，初時有驟雨及狂風雷暴，部份地區雨勢較大。市場關注美國債務上限談判進展，美股個別發展。美國債務上限談判最終料可達成協議，債務違約可能性幾近零，但兩黨要達成協議，或實施財政限制，或拖累中期經濟表現，唔排除美股借勢調整。
目前，美股投資者正押注債務上限談判達成協議，雙方將持續到未來一周繼續談判。鑑於任何妥協都可能減少或延遲政府支出，可能對企業盈利及消費者支出產生負面影響。換句話講，未來兩個月影響股市嘅重要因素，可能係企業盈利能力和失業率上升程度。睇返過去半年環球股市升勢相當集中，MSCI環球指數中嘅2880間公司一共增加咗5.5萬億美元市值，但其中超過五成升幅來算10間公司，包括美國幾間大型科技公司，受惠於中國重新開放嘅歐洲奢侈品巨頭，及全球最大石油公司等。中小型企業一直跑輸，一旦因為財政限制而影響到中小型企業盈利表現，影響甚至延伸至大型企業，美國目前升勢或有機會逆轉，呢一點不得不留意。不過股市升跌，從來都係由資金主導，只要市場資金仍充裕，對美股後市又唔需要太悲觀。
只係喺預期經濟衰退機會增加之下，高風險資金如黃金、石油等價格下跌，虛擬貨幣走勢亦疲弱，BTC跌穿30000大關後未見反彈，進一步失守27000支持。結果市場游資由呢類資產湧入股市尋找機會，AI概念股受捧，令美股出現升勢過份集中嘅現象。
隔晚美股走軟，但反映中概股嘅中國金龍指數卻升逾2%，或對今日港股嘅科網股帶嚟支持及炒作借口。只係就幾隻重磅科技股公布業績前後表現睇，信佢又死，唔企又死，結果又係一堆韭菜被割。對於港股整體表現，繼續乏善可陳，成交維持喺千億之下，買賣兩閒繼續，未見有新資金入場。基金大戶唔願買貨，散戶被割至無錢再入場繼而死心。港股近日仍走唔上千點之內上落，日升日跌嘅反覆狀態，波幅收窄待大戶肯入場儲貨，都需要一段時間喺低位收集，隨時悶你一年半載，睇款港股有機會步入呢個狀態。即使有合理估值嘅優質股可以買入，都需要耐性守一段時間，但如今講求節奏嘅時代，仲搵邊個肯同你坐定定，呢個亦係港股成交一直薄弱嘅原因。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。