美股反彈仍需注意資金流向
5月18日，天晴，乾燥，間中吹清勁強風。美股隔晚反彈持續，三大指數高收，道指升431點；標指跟納指分別升80點及321點。坊間一直有聲音指聯儲局太遲加息，令通脹飈升，鮑爺終於應錯，表示聯儲局應該早啲加息。鮑威爾再度重申，美國通脹「太高」，需要降低通脹水平，又指通脹數據實際上早於2021年10月份就開始出現了改變；為過熱需求降溫顯然係聯儲局職責。亡羊補牢未為晚也，鮑爺再強調降低通脹嘅決心，指聯儲將毫不猶豫地繼續加息，直到通脹回落。而聯邦公開市場委員會(FOMC)廣泛支持喺接住嚟緊兩次會議上各加息0.5厘。話雖如此，即吏10年期債息重返3%，但市場似乎對聯儲局繼續加息早已有心理準備，市場恐慌情緒大減，美股反彈持續。
美股能夠保持反彈，主要係目前美股流動性仍相當充裕，5月份全球基金持有現金水平已達20年新高，咁即係基金都無乜貨要沽，呢個係支持美股近日反彈嘅原因。不過聯儲局下月先開始縮表，留意縮表後流動性會否出現變化。
劉鶴表態支持數字經濟，支持民營平台經濟發展，聽落似想放生一眾科網龍頭，中概股表現硬淨。3月中曾唱淡科網股嘅摩通都轉口風，話睇返好呢個板塊，調高板塊內股份評級及目標價。不過摩通呢下唱好係咪表示要追貨，古天后有所保留，皆因摩通3月中唱淡科網股後，相關股份甚至大市即見底，今次反手唱好，唔知會唔會又中招。
汽車股走勢特別強，主要係受到汽車下鄉消息所刺激，相關政策有望6月出台，每輛車補貼3000元至5000元，可望刺激25萬部燃油車及40萬部新能源車的銷售量。汽車股自去年第四季開始回落，除咗比亞迪(01211)之外，其他重磅汽車股如長城(02333)跟吉利(00175)累計跌幅驚人，歸根究底係之前炒過籠，但經過3月觸底後，喺低位橫行咗兩個月，呢一輪借消息反彈亦好正常。不過古天后對相關股份，除咗比亞迪之外，都唔敢太樂觀，主要係上面積壓嘅蟹貨太多，反彈路途將阻上較多阻力。反而之前喺210元樓下建議買入嘅比亞迪，有貨可以坐多陣，呢一次上到260企得住，再下一城可以上望280元，暫時可以260元為止賺參考繼續持有。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。