美股單日波幅擴大趕客
7月6日，大致多雲，有驟雨及幾陣雷暴，部分地區雨勢頗大。美股假期後表現反覆，三大指數早段跌勢較為顯著，道指一度跌逾700點，至收市跌幅收窄至129點；標指跟納指盤中亦跌逾2%，至收市兩指數倒升，分別升6點及194點。
隨着近期愈來愈多經濟數據顯示需求放緩，市場焦點亦逐漸從通脹轉移至經濟衰退。大摩美股策略師Michael Wilson表示，如果下半年通脹見頂，聯儲局可能會稍為放緩其鷹派立場。不過近日債息回落至3厘樓下，並非通脹真正回落，係反映市場憂慮經濟衰退，多於聯儲局放鬆貨幣政策，目前喺通脹高企下，聯儲局放水言之尚早。至於高盛全球固定收益宏觀策略師Gurpreet Gill則表示，隨係緊縮貨幣政策持續，美國比較可能會出現「技術性衰退」，即國內生產總值(GDP)連續兩季萎縮，但並唔係真正衰退。
美國經濟係咪衰退，暫時未能確定，但油價及資源價格已行先一步，油價隔晚急跌，呢啲或者係預示經濟衰退嘅先兆，至於嚟緊嘅業績期，當美企陸績派成績表，若然各大小企業嘅業績不似預期，再加上調低全年業績預測時，就可以證實美國真正步入衰退與否。不過喺證實美國經濟是否衰退前，美股近日嘅單日波幅，已經嚇怕唔少投資者，單日大市上落超過2%變成日常，而個股單日波幅更去到10%，即係話家陣美國參與投資者，已變為投機者居多。而當單日波幅愈大，市場承受能力相對減弱，而短線情緒已控制市場，只會趕走更多市場參與者。
至於中港股喺估值上，本來較美股有一定優勢，但當美股逐步調整，尤其重磅科技股，港股跟美股市場此起彼落，即係兩地類似股份估值拉近，其至美股嘅龍頭科企變得更便宜，難免令投資者寧願將資金配置到美股市場。舉個例子，當小米(01810)跟蘋果公司(APPL)兩者估值相若，聰明投資者會點揀?? 好似電商股京東(09618)跟亞馬遜(AMZN)，兩者估值相約，考慮到內地科企曾被嚴厲監管，即使目前監管已告一段落，但國際投資者曾有過如此不愉快經驗，為咗避免再要承受未來可能出現嘅政策風險，寧願選擇美股嘅同類股份。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。