美股將踏入業績期或迎來一波震盪
7月12日，天晴，日間天氣酷熱，炎熱天氣將維持。通脹高企持續困擾美國經濟，而美匯指數升至20年高位，令美股回軟，三大指數下跌，市場觀望財務季度本周開鑼，企業盈利表現或對美股估值有所啟示。
摩根士丹利首席美股策略師Michael Wilson表示，企業盈利前景唔太明朗。歷史反映，當美元極端走強時，往往係市場受壓或經濟衰退，甚至兩個狀況同時出現。佢又話美元飆升對好多美國大型企業利潤造成巨大衝擊，亦係盈利前景預測變得黯淡嘅其中一個原因，近期股市嘅反彈亦可能因此完結。
Wilson亦推算指美元跟美盈利之間嘅關係，美元匯價按年每增長一個百分點，企業每股盈利增長就會受到約0.5倍衝擊。換言之，按目前美匯指數按年約16%增幅計算，在其他條件唔變嘅情況下，標指成分股企業嘅每股收益增長恐面臨8%衝擊。喺呢啲因素之下，亦係古天后之前提到，當美股踏入七八月業績期，或會迎嚟另一波震盪。
強勁嘅美元唔單止打擊美企盈利表現，同時令其他貨幣相對貶值，人民幣離岸價跌咗400個點子，而美國縮表收水只係剛剛開始，若然按目前嘅時間表去進行收水，未來仍有兩年時間進行縮表，即係美元未來一段時間維持強勢。
內地面對外資流走，5月已加大力度放水，6月繼續開turbo，M2喺6月增速提升至11.4%，按月再增0.3%，增加貨幣供應後，6月貸款增加2.81萬億元，同比增6867億元。阿爺放水刺激經濟，其中大部份用喺基建，總理李克強報告中已說明，工程提前上馬，不過唔係追加預算，變相係透支下半年用度先穩住經濟。
上月一次過透支下半年額度，而下半年可能面對更大走資壓力，經濟情況更為唔明朗，嚟緊又到業績期，若然美股表現受業績期影響，中港兩地股市亦難有作為。目前港股仍處於上落市狀態，基於估值已回落至合理水平，再大跌機會唔大，而古天后仍堅持港股已於3月中成功尋底，只係今次由22500水平回落，22500形成雙頂，是次回吐幅度以2000點計算，大約係20500點水平，剛好亦係牛證重貨區之所在。而喺21000水平左右，可以開始分段收集優質股份，180元嘅美團(03690)，240元樓下嘅京東(09618)，以及290元樓下嘅比亞迪(01211)，都係可以收集嘅重磅股份。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。