美股後市還須睇住通脹回落速度
11月23日，多雲，有驟雨，局部地區有雷暴。隔晚美股雖然偏靜，但三大指數上升，升幅逾1%，之前已多次強調，只要標指守3900，納指守11000水平，兩者上升軌未被破壞，後市仍有機會繼續向上挑戰阻力。除咗世界杯因素，呢個星期美國無乜數據公布，只有今晚11月份聯儲局議息紀錄，明晚感恩節假期，周五只有半日市，呢個星期美股偏向淡靜。留意下星期一會公布感恩節銷售數字，若然感思節銷售數字理想，喺美國零售佔GDP高達70%嘅情況下，將反映美國經濟情況理想，咁美股喺12月多數向好。
對於美股目前走勢，究竟係步出熊市見底回升，定係僅為技術反彈，暫時仍未可以肯定，而今次美股由牛入熊，主要係加息周期開始，通脹急升所做成。喺聯儲局數度加息後，近期公布嘅通脹數據反映通脹有望見頂，即係之前令美股回落嘅因素消退，只要通脹回落速度加快，通脹見頂確認，加息周期自然結束，咁美股就有望扭轉熊市入牛。
不過值得留意係過去兩季經濟放緩令美國零售企業庫存急升，過去兩季大幅削減訂單，結果令工廠生產跌入低谷，各原材料需求自然回落。目前要留意，零售商經歷兩季度努力清庫存後，重新進入補庫存階段，工廠開始有新訂單，喺需求回升下，一旦原材料價格回升，咁通脹或會再次受威脅，咁息口見頂，加息周期完結呢個如意算盤就打唔響。
另一點要留意係國際航運成本正不斷上升，油價雖然因為亞洲需求下降而回落至81美元，但海運成本仍然高企，較年初時高三倍，由於俄烏戰爭，不少運油輪要改道而行，船運時間拉長形成運載率下降，成本自然上升。暫時仍未可肯定通脹係咪已經見頂，但從美債息嘅走勢睇，情況都仍然係樂觀嘅。
至於港股就偏向淡靜，暫時喺條10日線附近上落，相信守住17400及10日線，係好友致力要做好嘅事，而50日線及17000水平，將會係好友最後防線，一旦失守，就難以再挑戰100日線及重上萬八水平。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。