美股插水爆雷 中港股市難獨善其身
6月14日，大致多雲，有驟雨及幾陣狂風雷暴，未來數日天氣仍不穩定。美國隔晚繼續大幅下跌，道指最多曾跌1019點，全日收報30,516點，跌876點；標指跌151點創今年以來收市新低，並自高位回落逾兩成，陷入「技術性熊市」；至於早已陷入熊市嘅納指，跌530點，跌幅高達4.68%。
上周五的美國通脹數據創40年高位，令美國大幅加息的預期升溫，美債孳息率急升。10年期美國國債孳息率周一升24點子，至3.39厘，創自2020年以來最大升幅，並處於2011年5月以來的高位；兩年期美國國債孳息率則升30點子，報3.346厘。債息高企令科技股走軟，主要係當債息已有接近3.5厘回報，甚至有機會升至4厘嘅情況下，被視為無風險資產嘅國債吸引力大增，投資者自然唔願意將資金投放喺風險較嘅股票市場上。
而美國自2008年金融海嘯發生後，持續QE嘅寛鬆貨幣政策，令唔少企業任性地享受低息借貸，大量燒錢以擴大市佔率及爭佔市場為目標，已完全忘記一門生意要產生盈利嘅本質，市場已再不顧及基本因素，乜嘢市盈率，市帳率早已拋諸腦後，代之而起嘅係市銷率，甚至市夢率呢啲完全遠離實際情況嘅虛幻數字。嚟到依家加息周期重臨，當借貸成本上升，一切都要回歸基本，市場無法再透過現金流去支持泡沫投資，通脹令所有虛幻現形，近日一直無實質價值支持嘅虛擬貨幣市場爆泡，大量虛幣急瀉，正好反映投資者頭腦開始清醒。
息率持續向上，美股大幅回落，再加上幣市爆煲，下一個引發資本市場再大幅震盪嘅計時炸彈，就輪到公司債，2008年金融海嘯，就係由房貸市場爆雷而引起，今次一旦爆雷，唔排除係由公司債由爆。美股跌到一仆一碌，中港股市亦難獨善其身，即使阿爺出招再頻密，政策再多，亦未能一下知可以谷起經濟。當美股繼續下滑，本來估值昂貴嘅美股，都變得吸引嘅時候，港股雖然已行先一步大幅調整，但無比較就無傷害，當美股再插水變到一街平貨嘅時候，港股嘅吸引力自然大減，港股有乜嘢本事吸引資金流入，古天后到呢一刻都諗唔到答案。既然外圍風高浪急，又怕貨比貨嘅情況下，不如謀定而後動，呢啲時間都係靠邊站，食住花生等見底。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。