美股走勢愈見波動 提防風暴隨時殺到
8月18日，部份時間有陽光，有幾陣驟雨，日間天氣酷熱。阿富汗局勢動盪，地綠局勢不穩，加上美國零隻數據欠佳，令美股隔晚早段受壓，道指最多跌505點，收市跌幅收窄至282點，報35343點；標指跟納指分別跌31點及137點。市場已預期聯儲局或提早收水，聯儲局或隨時縮減買債，而稅率可能上調，以及通脹持續升溫，將會令美股走勢更為波動。
美股再波動都好，由去年疫情爆發以嚟，美股見過低位後持續向上並屢創新高，相反港股表現唔單止係落後，完全係失禮，尤其係今年初北水大量湧入，帶動大市高見三萬大關後，當北水熱情減退後，港股可以話無好日子過，大市回落至27000至29000水平上落。不過北水對港股熱度退減，對港股構成嘅負面影響，遠不及內地監管風暴對港股打擊。內地監管風暴重擊科網股，偏偏科網重磅股ATM為恒指權重股，ATM走勢持續疲弱，令港股走勢不堪入目。
自刮起監管風暴後，古天后早揚言，ATM一眾科網股都無運行，期內只會有波幅而無升幅，投資者避之則吉，雖然相關股份估值已跌至合理，甚至吸引水平，但奈何阿爺以唧牙膏方式連環出招，實在叫投資者無所適從。已從相關股份流出嘅資金，暫時無意重返呢個板塊，睇嚟科網股仍需一段時間養傷。最攞命嘅係科網股養傷之際，有關監管聲音不絕，叫人無所適從，叫投資者又點會放心入場。
唔單止內地監管令投資者卻步，中美角力，金融市場成為主要戰場之一，自7月開始，中國藉滴滴事件啟動喺美國嘅中概股「撤僑」行動，而美國亦不甘示弱，反正中概股撤離美股已令美投資者股財兩空，美國不忘向中概股踩多腳，美國證交會(SEC)主席詹斯勒，嚴辭警告投資中概股風險，打響中美金融戰嘅重要一槍。本身係民主黨人嘅詹斯勒呼應美國國會去年底通過嘅《外國公司問責法案》，「(中概股)經營內地業務的實體之核數師，若未來3年仍不(向美國監管機構)公開帳目和紀錄，管他在開曼還是中國註冊，一律不准在美國掛牌」。
國際局勢多變，而中美金融正步向脫鈎，。由美元資產爆泡引發嘅金融風暴隨時殺到，中國率先以整頓科網股為由，為中國資產擠出水分，希望將風險降至最低。不過喺呢個過程中，已不知幾多小股民損手，被割韭菜捱唔住……..
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。