聯儲局主席之選成市場焦點
9月7日，部份時間有陽光，局部地區有驟雨，天氣炎熱。隔晚美股假期，今早道指期貨靠穩。當市場對美國收水憂慮減退之際，又輪到擔心鮑爺連任問題。美國聯儲局主席鮑威爾四年任期將於明年2月初屆滿，市傳美國總統拜登會喺秋季作出決定，係咪提名鮑爺繼續連任。嚟緊呢段時間美股市場將聚焦聯儲局主席人選，或會令市場較為波動。雖然有指消息財長耶媽已表態支持鮑爺連任，但部份民主黨議員希望聯儲局主席喺監管、氣候及經濟方面能跟該黨立場更為一致，恐怕會成鮑威爾連任嘅絆腳石。
唔想鮑爺連任嘅民主黨議員批評，鮑爺喺大型銀行監管方面唔夠強淨，部分更認為若非國會通過大規模嘅財政刺激方案，加上聯儲局為信貸市場提供支持措施，銀行業早喺舊年爆疫後「出事」。而有部份議員則認為鮑爺喺推動數碼貨幣發展未有出力，而接捧鮑爺嘅大熱人選布雷納德表示，聯儲局有迫切需要推動數碼貨幣發展，並提到中國跟其他部份國家已經開發了自己嘅數碼貨幣。相比之下，鮑威爾7月喺國會表示，未能判斷數碼美元嘅好處有否超過代價，更淡化美元可能因中國數碼貨幣發展而失去全球儲備貨幣角色嘅風險。無論點都好，美股喺高位徘徊，作深渡調整風險唔細，一旦聯儲局下任主席唔啱市場心水，隨時成為調整藉口，缸邊友不得不提防。
一旦美股迎來深度調整，咁中港股市何去何從?? 過往美股走勢一直主導港股，呢近幾年美股對港股影響力愈來愈低，港股反而更緊貼內地A股走勢，更有口痕友揚言，港股淨係識跟美股跌，美股升就完全跟唔上，以至港股呢幾年表現遠遠落後美股。
不過近半年，內地經濟增長放緩，加上對各行業執行嚴厲監管，打擊多個新興行業，藉此推動整改，但就令到中港兩地股市出現明顯調整。雖然中港兩地股市遠遠落後美股，但因為整改令年初漸見泡沫化嘅股市冷靜落嚟，為堅離地嘅新經濟股擠出水份，其實係令長遠發展更為紮實。若然嚟近美股出現深度調整，唔排除風水輪流轉，低殘估值嘅中港股市，成為資金避險之選。
事實上，近日港股正出現呢個情況，當離地估值嘅科網股跌到一仆一碌之際，估值低殘嘅傳統股，好似資源股、基建股及電力股均見資金追捧，市場目前更傾向追求估值合理，甚至低殘，而有一定盈利能力嘅傳統企業。將呢一套理論套用喺環球股市，中港股市相對其他市場，現價估值，尤其係港股，確係平到跌渣。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。