7月24日，大致天晴，局部地區有驟雨， 日間天氣酷熱，戶外工作留意補充水份，避免中暑。上周五Tesla公布業績後，雖然收入係新高，但毛利率則新低，拖累股價表現，影響埋市場氣氛，上周五美股偏軟，不過跌幅有限，當算企得穩。道指跟標指微升2點及1點；納指則跌30點。標指目前仍於上升通道部，表現偏強，未重回4400樓下，維持強勢。
呢個星期美股較多大型企業公布業績，包括Google、Facebook母公司META、阿馬遜及VISA等，資金上兩周開始流入現金流強勁嘅傳統股及防守性股份如PG等，美股進一新一輪板塊輪動。另外納指100將進行Rebalancing，七大權重股佔比將從56%下降至44%，預計有近百億美元追縱指數基金因應調整組合。另外，周三凌晨為聯儲局議息，加息0.25%幾乎無懸念，但市場更傾向相信呢一次係最後一次利率上調，美息今年年底前唔會再有太大變動，更甚者為最快明年第一季開始減息。不過都預咗鮑佬繼續把口放鷹，留意佢老人家會否提到息口見頂呢啲詞語，將被市場視為利好消息。
美匯指數仍在100大關徘徊，總算重返100關略為轉強，十年債息喺3.8%徘徊，而人民幣則重返7.2水平之下，反彈到呢啲位，似乎又差不多。至於港上周四高開300點，但北水當日卻錄得淨流出130億元，周三嘅165億元淨買入，大部份係過眼雲煙，未有於港股停留。其實近日有傳聞，指外資要合法地將資金撤離外地，其中一個方法就係透過港股通將資金南下先買港股，再喺港股沽出股份，就可以合法而安全地將資金從內地撤走，雖然呢個只係傳聞，但見北水呢幾個月，大額流入後，三兩日即流出，唔排除有咁嘅可能性。即係北水只係偽北水，更加唔好太多幻想，以為國家隊入場。其實睇埋A股成交，都應該明白邊有咁多國家隊入場買港股，連A股兩市成交每日都減至七八千億元，市場缺水問題嚴重，水清無魚，無論A股定係港股，都係神仙難救。
好似昔日股王騰訊(00700)，主要股東南非基金已表示年底前再減持3%股份，其後目標係每年再減持3%，即係長期有條大支嘢喺度沽貨，除非有大量新錢流入接貨，否則股份又係有波幅，無升幅。騰訊開始靠出售京東(09618)、美團(03690)及其他已投資嘅上市公司已獲取盈利，國進民退下，公司未能再透過收購其他科企壯大，目前只能防守，未能進攻，一間公司步入咁嘅境況，即係未來唔再係高增長，咁嘅情況下，仲有邊資金肯再投入。
連股王都要退守，未能進攻，其他中小企處境更難捱，過去幾年內地科企靠燒錢進行營商，不過自阿里宣布分拆，並表示分拆後各項業務盈虧自負，變相將燒錢業務剝離，過去靠燒錢搶佔市場嘅日子告終，未來只有賺錢業務可以生還。過往唔賺錢嘅公司，透過上市喺市場集資，割盡韭菜，但如今內地已再無咁多資金可供企業燒錢，韭菜亦被割得七七八八，資金鏈斷裂，公司無法繼續經營，最終亦只有走上破產之路。當一個股市嘅大部份企業都係無法錄得盈利，叫投資者仲點會有興趣繼續留低，呢個亦係港股跟A股完全進入有波幅，無升幅嘅主要原因。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。