能源及債務危機威脅下歐洲情況堪虞
6月24日，天晴，天氣酷熱，戶外活動，記得多飲水以防中暑。美股反覆做好，三大指數回升，美股繼續日升日跌，雖有反彈，但力度唔算強勁。芝加哥聯儲銀行行長埃文斯暗示，除非通脹回落，否則他仍會支持大幅度加息，並表示聯儲局首要任務係緩解物價升溫壓力。單次加息0.75厘符合當前對通脹嘅強烈擔憂，但同時承認利率快速上漲確實增加經濟下行風險。鮑爺亦未有放鴿，指聯儲局承諾「無條件地」抑制通脹升溫。
當鮑爺被問及如果聯儲局加息導致經濟大幅放緩，但同時又不能迅速降低通脹嘅情況下，聯儲局將如何應對時，鮑爺強調，聯儲局會因此而將加息轉向減息，只要睇到明確證據表明通脹正在以令人信服方式下降，才會轉向。整體而言，呢次鮑爺喺聽證會嘅講話維持放鷹，不過佢重申美國經濟可以應對更高利率，甚至預言今年下半年美國經濟增速仍然應當「相當強勁」，並相信隨住經濟正常化，物價將回落並恢復正常。
按常理聯儲局放鷹，美債息理應繼續高企，相反呢兩日美債息有所回落，令美股有機會反彈，但美債息竟回試3%水平，睇嚟係有部份投資者趁6月半年結先計數拆倉，而美匯指數高企，亦對美股帶嚟一啲支持。
不過歐股嗰嗰邊情況就無美股咁硬淨，除咗面對個別歐洲國家可能出現債務危機之外，更面對能源危機問題，德國警告俄羅斯削減對歐天然氣，已觸發能源市場崩潰，今次危機影響力同2008年雷曼兄弟風暴有得揮，德國PPI高達33.6%，基本上已摧毀德國工業生產，最新公佈PMI已降至52，唔排除德國工業生產開始步入收縮之路。有見及此，美國著名對沖基金穚水大手沽空美股，過去一星期沽空金額倍增至逾百億美元，似乎就係打賭歐洲喺債務及能源危能威脅下，出現金融危機爆鑊。
歐美情況唔樂觀，但A股同港股相對穩健，內地今個月基金發行量大幅回升，喺基金吸資情況改善下，A股成交額略見回升，但資金流入債券基金為主，股票基金亦乏資金流入，A股能否再下一城，要視乎稍後市場對股票基金嘅熱情會否升溫。
至於港股喺A股力撐下，暫能穩守多條移動平均線之上，不過資金開始由重磅股轉移至二三線股，甚至股仔亦開始見禾雀亂飛嘅情況，好明顯係資金唔願意喺現水平再追入重磅股，轉去跟隨莊家熱炒股仔以尋找機會。呢啲邊個最後入場接火捧就係傻仔嘅遊戲，古天后寧願唔參與。估計半年結粉飾櫥窗下，基金亦樂見恒指企喺21000樓上水平結算，暫時都係等呢個月半年結完結後，再觀察有冇資金流入，若然成交持續薄弱，港股即使能守住21000，但再向上動力亦相當有限。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。