與時並進跟上市場步伐免遭淘汰
12月30日，天晴乾燥，冷風殺到，日間氣溫較噚日低咗10度，今晚氣溫進一步下降至10度左右，如果今日要返工嘅朋友，記得著多件衫或帶定條頸巾保暖。美股隔晚早段再創新高，只係升勢無以為繼，至中段三大指數回落，收市三大指數倒跌。不過美股升咗咁多，喺元旦假期前抖抖回吐都好正常，目前市場仍被樂觀情緒籠罩，除咗疫苗順利面世之外，通過新一輪刺激方案有助經濟過渡，並入明年步入復甦。
過去四年喺侵侵坐鎮白宮期間，美股出現咗「特」式升市，但美股坐火箭嘅升勢，或隨住拜登上任而終結，美股來年表現或不及過去四年。市場主要擔心新政府會推倒前朝減稅政策，又或者推行更多針對大企業措施，令美股難以再如過往大幅跑贏環球其他股市。自侵侵喺2017年1月就職以嚟，標指累漲超過60%，部分係得益於減稅帶動企業盈利急升，及以破紀錄速度回購股份。
古天后一向唔多鍾意對股市作任何預測，尤其喺資訊科技發達下，股市及股份運行周期愈縮愈短，而政策風險更加難以估計，如期費盡心機去預測來年股市走勢，又或者乜嘢股份最值得投資，倒不如順勢而行。以古天后累積多年嘅投資經驗，只要緊貼市場，市場發展自自然然會告知投資者乜嘢股份熱炒，只要跟隨資金流向，又何需去預測，總之go with the flow，跟紅頂白一定無錯。
回顧2020呢一年，可以話夠晒「靈異」，至今仍未搵到源頭嘅病毒，掀起全球世紀大疫症，令全球經濟陷入停擺。喺疫情於第一季尾全球大爆發之際，美股插水更於短短十個交易日期間，幾度出現熔斷，就連股神巴菲特話有生之年竟然遇上美股呢個情況，連佢都大開眼戒。股市急挫嘅震盪未完，又到期油市場出現從未見過嘅負數交易，買期油有仲有錢收，確係聞所未聞，但原來又真係會發生。
相對本地股民，美股熔斷及期油負數，都不及大笨象(00005) 股價及相關新聞 暫停派息嚟得震撼。受英倫銀行指示，建議喺2020年要暫停派息，大笨象跟另一於米字旗國註冊嘅渣打(02888) 股價及相關新聞 均要遵從指示。唔少退休人仕一直靠滙控派四季息作退休收入，原來收咗廿幾三十年大笨象股息，可以話唔派就唔派，大笨象小股東召開記招，喊得一句句兼呼天搶地嘅一幕，古天后仍記憶猶新。其實按本港嘅上市條例，並未有規定上市公司必要派息，除非係公司章程講到明會派息嘅基金，例如一般房產基金(REIT)又或者大家熟悉嘅盈富基金(02800) 股價及相關新聞 等。
古天后一直強調，買股收息呢種old school概念真係要改改，既然股票被視為較高風險資產，買嚟穩定收息已唔合符風險回報成正比呢個大原則，緊記買股票係追求資本增值，諗住買啲高息股嚟收息，往住要承受收息輸價嘅風險。尤其依家股市周期愈縮愈短，經濟結構喺科技發達之下亦跟過往大有不同，唔好一本通書睇到老，炒股同做人一樣都要與時並進，未能跟上時代步伐，往往會被市場自然淘汰。
明日大除夕只有半日市，有跟隨古天后今年指示投資港股，今年應該大豐收，既然如此見好要收，提早收爐都好合理。先預祝各位喺新年進步，趁元旦假期檢討一下過往一年嘅炒股成績，希望來年跟各炒股手足更上一層樓。
P.S. 明日除夕半日市，【古天后日誌】暫停一天，2021年再戰缸湖。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。