航運價狂升加速去全球化
8月13日，部份時間有陽光，間中有幾陣驟雨，初時局部地區有雷暴。美股隔晚又升，雖然早段美股走軟，但道指跟標指收市最終又創新高，分別升14點及13點；納指亦升51點。美國通脹數據反映通脹放緩，而就業數據則持續改善，不過通脹仍有機會向上，已聯儲銀行行長支持結束QE，話美國已有條件收水，貨幣政策係時候作出調整。留意本月底嘅Jackson Hole央行年會，唔排除美聯儲局喺會議上對貨幣政策重大轉變作出宣布。
至於港股彈力始終有限，目前恒指仍然喺10日線(26326)及20日線(26568)附近上上落落，而古天后一直強調，上月底大市下挫至24800水平成功搵到支持，即使見底反彈，走勢亦傾向反覆，而恒指一日唔重上27200水平並企穩，港股都只會有波幅，無升幅。
美國通脹數據雖然有所放緩，但直接影響物價指數嘅航運費繼續狂升，受變種病毒肆虐，加上多地嚴重天災，全球復現經濟再次陷入停擺危機，多個大型港口嚴重堵塞，適逢進入年底節日前嘅貨運旺季，令運費急升，呢個因素或導致通脹壓力增加。為咗調控風險，各國將加速調整供應鏈，增加本土或鄰近供應，減少跨域採購，變相令全球化進一步減退，中美脫鈎加速實現。
上月美國總統拜登曾督促官方調查海運運費是否涉及遭人為扯高，結論係無發現業界聯手操縱，航運費上升因為疫情跟天災因素，實非人為操控價格所致，今次供應鏈大亂相當難搞，美國當局想化解亦顯得有心無力。面對病毒變種，各地不但束手無策，更各自為政，到呢一刻都未見有統一防疫隔離標準，嚴重影響船員及貨櫃碼頭員工輪替，定必令全球供應鏈持續受到影響。全球面對多方面短缺，包括原材料、貨櫃、晶片、疫苗及糧食，短缺問題持續，迫使製造業加快改革供應鏈，提升機械化及本地化，或以周邊供應替代，減少跨境運輸及進口，換句話講就係進一步去全球化。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。