航運股料可持續跑贏大市 候回調吸納
4月29日，多雲，早段有一兩陣驟雨，午間短暫時間有陽光，周末天氣轉晴及炎熱。隔晚聯儲局維持利率不變，呢個都係預期之內，重點係雖然通脹有所升溫，但就業及通脹目標仲有一段距離，所以聯儲局將繼續每月買入最少800億美元美債及400億美元按證，意味住聯儲局未有耐收水。美股隔晚回軟，三大指數齊跌。
今日期指結算日，睇返4月份，港股一直喺一千點左右窄幅上落，未能走出區間突破，好友幾次嘗試攻上50日線(29136)，一直未能企穩，即管睇睇結算後能否上挑戰29250至29300阻力。下星期踏入5月，坊間又開始掀起五窮六絕之說，不過古天后又唔係睇得咁淡，暫時亦搵唔到有乜嘢理由要插水，只係十個牛皮九個淡，加上港股缺水情況未見改善，確令人難對後市樂觀。加上北水由今日起放假暫停，至下周四先再入場，呢個星期少咗北水支撐，5月開局又係悶局一場。
重磅企業陸續公布業績，大笨象(00005)業績表現唔錯，不過大行最牛目標價都只係52元，現價仲博唔博真係見仁見智。至於港交所(00388)首季業績市符合市場預期，近日港股交投雖然較為淡靜，但唔少公司抽水配股，整體成交又未至於太疲弱。而下半年可能較多重磅中概股回歸港股上市，下半年港交所業績仍值得憧憬。
市場一宜擔心通脹重臨，單係睇住航運費上升已預咗今年百物騰貴，波羅的海乾散貨指數持續上升至近十年高位，正正因為高質素巴西鐵礦砂出口至中國帶來海岬型船板塊復甦，煤炭貿易反彈，以及農作物及小型散貨展望正面。而中國乾散貨進口強勁，來自美國進口農作物勢頭加大，尤其係穀物及少量散貨方面，物價自然節節上升。之前古天后都有講過，投資組合內需要配置呢一個板塊股份，只係相關股份自2月份起累計升幅閒閒地四五成，想買貨都要等回調收集，反正整體航運業基本面轉為利好，航運股今年之內都應該可以跑贏大市。古天后其中一隻心水航運股係太平洋航運(02343)，因為估值重評料可持續，不妨待其股價回調至10日線約2.5元水平，甚至回補上周上升裂口底部2.4元先入場，跌穿2.3元止蝕，上望首目標3元，下一目標3.5元挑戰歷史高位。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。