藍籌新貴有貨要識落車
8月22日，大致天晴，局部地區有驟雨，日間天氣酷熱。上周五美股三大指數下跌，10年期債息重上2.96%，科技股受壓，加上加密資幣顯著下跌，之前市場過度樂觀情緒有所收斂，市場觀望本周央行年會Jackson Hole，鮑爺會否放鷹。
上星期美股高位徘徊，古天后都講過，重磅一線股上升動力減退，資金開始轉炒二三四線股，散戶追捧Meme股，通常炒到垃圾股，出現劣常驅逐良幣嘅情況，美股升勢好大幾會已接近尾聲。而最近美國又話出咗個少年股神，廿歲仔靠炒Meme股，一個月內勁贏超過1億美元。
一聽見有乜乜少年股神，師奶股神，民間股神出現，就係反映嗰個市場炒股氣氛熾熱，就算未至於全民皆股，都係全部股民情緒極度高漲，一旦市場氣氛逆轉，咁多散戶爭相逃走，好似出現人踩人嘅慘劇。
內地股市漸入佳景
美國講緊有機會聯儲局再放鷹，相反內地呢邊一直削削地加大放水力度，上週一年期MLF中標利率下降10點子至2.75%，市場預期今日公佈嘅8月LPR可能下調10點子，5年期LPR更可能下調15點子。喺阿爺持續放水下，內地股市漸入佳景，滬深兩地股市維持過萬億成交一日，資金充裕下，A股喺現水平稍作整固，有機會繼續向上。
至於港股繼續一潭死水，上周每日成交維持800億左右，外圍升跌都好似唔關港股事，港股繼續喺20000水平上下幾百點上落，完全無乜睇頭，講到尾缺水問題一日唔解決，港股都係死到直。雖然踏入業績期，但要炒業績亦唔容易，有息派嘅股份表現好少少，好似藥明生物(02269)就算業績好過預期，但無息派股價彈一彈又係畀人質返落去。
上周五恒指服務公司進行季檢，恒指加入四股，包括中國神華(01088)、周大福(01929)、翰森製藥(03692)及百度(09888)，恒指成份股增至73隻，今年要達標加到80隻恒指成份股無乜難度。不過過去兩年，但凡被欽點加入藍籌嘅股份，股價都無好下場，見頂後回落，更有部份股份喺染藍後唔見一半，難怪口痕友話一染藍，價更殘。如果手上有呢幾隻股份，好趁今日染藍消息刺激好消息出貨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。