藥明生物批股又提供上車機會
4月27日，多雲，間中有驟雨，早段初期風勢清勁。隔晚美股個別發展，標指跟納指創新高，只有道指跌61點，重磅科技股普遍上升。美國企業呢個星期進入業績高峰期，目前已派第一季成績表嘅美企當中，超過八成公司每股收益好過預期，如果呢個比例維持到業績公布期完結，將會成為自2008年表現最高嘅一季度。大摩跨資產策略主管認為，隨住更多強勁經濟數據出爐及美國推出更多刺激經濟方案，市場預期將出現更強勁經濟增長，但後疫情釋放市場消費力，以及疫苗接種普及，有機會帶動通脹回升，大家要為一個更波動嘅市況做好準備。
雖然標指跟納指齊創新高，但隔晚港股ADR及夜期均見下跌，美團(03690)因為遭到內地調查涉壟斷行為，股價喺ADR跌逾4%，睇嚟今日股價或重返300水平之下。而藥明生物(02269)主要股東減持套現，以每股配售價107元配售1.08股，套現逾115.56億元，配股價較昨日收市價折讓6.79%，接近上限範圍，反映市場反應不俗。藥明生物喺過去一年曾出現多次公司配股集資或主要股東減持套現，但每次股價守到配股價後，其後定必繼續上升，至於今次會否一如過往，古天后傾向相信藥明生物將偱過往路徑一樣，只要配股股份仍落入強中手。是次配股話唔定又提供上車機會，吼位喺105至108左右上車，跌穿100止蝕，上面當然睇返120上破後再破頂。
至於遭內地調查涉壟斷嘅美團，繼阿里(09988)後有機會成為第二間被罰款嘅大型科企，較早前集團配股集資，而接貨者亦有心理準備美團或遭罰款，但仍唔介意接貨，加上美團以上限訂價，反映投資者仍睇好其前景。而美團成功集資，亦似為被罰款先作準備，估計美團未必會重返上次批股低位，290元應該守得住。反而係市場將繼續留意下一個輪到邊個被阿爺罰，京東(09618)成為大熱門。京東旗下京東物流啟動上市，集資額將逾300億元。不過踏入第二季後，新股無論size大小，表現麻麻，加上科網股已較高位大幅回落，估計京東物流或面對估值壓力。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。