蘋果出電動車對行業整體發展係好事
12月22日，多雲乾燥，早上相當清涼。日間部份時間有陽光，令日間唔係覺得有幾凍。英國出現變種病毒令傳播失控，利淡消息令美股早段插水，道指一度跌跌逾400點，不過美國國會已通過9000億美元新一輪財政紓困方案，投資者對經濟復甦感到樂觀，美股跌幅收窄，道指更倒升收市；標指跟納指則跌14點及13點。
英國嘅變種病毒確係嚇親人，傳播性更快更強，投資者感憂慮亦屬正常，不過疫苖已開始投入應用，只要疫苖能有效控制病毒傳播而又無重大副作用，有專家認為明年第二季環球經濟可回復正軌，目前歐洲疫情變化及邊境封鎖唔會維持長時間，中期經濟前景唔需要太悲觀。
不過疫苗只係剛剛推出，由於物流程序複雜，能否順利分發及推出仍有疑問，反而有否副作用仍然係其次，明年上半年可以分發幾多疫苗成未知數。而持續嘅寬鬆貨幣環境有機會喺明年經濟復甦後引發通脹，而新主入主宮令政策平添不明朗因素。
美股有本事拗腰再上，港股又何去何從？港股一直明顯落後美股，一隻大笨象(00005) 股價及相關新聞 打個冷震，已經令恒指無好日子過，話咗呢啲傳統股只係反彈，要擺脫長期弱勢回勇仍言之尚早。幸而古天后由年中開始已強調，今年大部份時間都係炒股唔炒市，早已放棄追逐指數升升跌跌，集中喺板塊尋寶。
呢期要數最受歡迎嘅板塊，當然係新能源股，減碳減排係全球大趨勢，新能源相關股份，包括清潔能源及電動車一直係吸引資金嘅寵兒。就連全球手機生產商一哥蘋果公司都表示要發展電動車Apple Car，該款電動車將內置蘋果公司自有嘅電池技術，目標喺2024年開始生產。另有報道指台灣關鍵供應鏈證實，蘋果公司預計明年9月發表Apple Car，比原先規劃提早至少兩年，其原型車已經喺美國加州上路測試。
Apple Car面世會否對現有電動車生產商如比亞迪(01211) 股價及相關新聞 帶嚟威脅，講真未來市場對電動車需求有增無減，內地早已訂下目標至2030年，電動車佔所有汽車八成，呢個係一個相當驚人數字，未來電動車行業發展只會愈趨暢旺，電動車生產商可能出現百花齊放嘅現象，相互競爭反而令技術更為先進，對整體行業發展反而係好事。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。