虎去兔來 疫情之苦過後如兔跳脫
1月20日，大致多雲，早晚有一兩陣微雨，日間短暫時間有陽光，天氣乾燥。美國政府支出觸及債務上限，而聯儲局官員又持續放鷹，市場憂慮息率高企或拖累經濟，美股隔晚下跌。三大指數全線向下，道指跌252點；標指跌29點；納指亦跌104點。不過反映中概股表現嘅金龍指數逆市向上，帶動夜期及ADR隔晚上升，估計今日大市將裂口高開，重上21800水平。能夠企穩21800水平高開高走就兩睇，畢竟長假期前夕，投資者會傾向減磅套現。
不過大市已兩三度考驗10日線，大約係21400-21500水平靠穩，短線未見有太大回吐壓力，即使假期前成交縮減，但喺回吐壓力有限之下，大市仍處於高位震盪，暫時都唔似會出現較大幅度回調。港股自去年10月見底回升後，踏入2023年表現持續向好，呢個跟美元由極度強勢開始轉弱有關。
目前全球趨向逐步去美元化，資金自然開始向外尋找投資機會，而中港股市經過去年大幅調整後，唔少過去估值過份高昂，甚至見沫泡成份嘅優質股份，已回落至合理甚至吸引水平。相反美股去年跑贏全球股市，雖然較高位有所調整，但相對中港股市，估值唔講得上便宜，機構投資者資金重新配置，加重中港股市投資比例，令中港股市，尤其港股喺呢兩三個月表現突出。
美國今年經濟會否陷入衰退仍成疑問，但長年嚴重透支美元信用，美國支出多次觸及債務上限，喺去年通脹高速增長下，被逼結束多年極度寬鬆嘅貨幣政策下，資金亦出現轉移。雖然在疫情期間，一度令全球資金推去美元避險，令美元去年出現一匯獨強狀況，但隨住全球走出疫情，步向復常，而歐洲亦喺俄烏戰爭下，捱得過能源危機，促使更多資金流出美元，尋求非美元資產爭取更合理回報，新興市場今年有望跑贏美股，東升西降或係今年嘅投資主題。
港股至10月見底回升至現水平，累計升幅已達五成，當然喺21000水平先入場嘅值博率已大減，港股今年要走得更遠，一個較大嘅調整，係較為合理嘅走勢。暫時港股1月份高開高走高收似無懸念，開始踏入業績期，重磅股嘅業績表現，同埋今年嘅業績預測，或成就下月港股嚟一次較大幅度調整，不妨耐心等候更佳入市時機。
虎去兔來，希望隨住虎年完結，疫情苦況結束，踏入兔年，期望港股如兔仔般跳脫，今年有更佳投資環境，但一切仍要睇實際經濟情況，能否喺疫情過後，如期復常。古天后先同大家拜個早年，祝大家身體健康，股期皆勝。本專欄今日收爐，雖然初五復市，但本專欄則於初九開市，本月30日期結日回復正常。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。