虛幣暴跌料未禍延港股
5月20日，多雲，間中有幾陣驟雨，天氣酷熱，部份時間有陽光。噚日港股假期休市，不過外圍市場風起雲湧，虛擬貨幣爆斬倉潮，原因係中國互聯網金融協會、中國銀行協會，以及中國支付清算協會周二發布聯合公告指出，虛擬貨幣嚴重侵害人民群眾財產安全，擾亂經濟金融正常秩序。阿爺一句唔畀玩虛擬貨幣，金融機構、支付機構等唔可以用虛擬貨幣為產品及服務定價；亦唔可以承保與虛擬貨幣相關嘅保險業務，或將虛擬貨幣納入保險責任範圍等。總之阿爺打擊虛擬貨幣，目的係為推數碼人民幣鋪路，對其他虛擬貨幣零容忍。
一直有傳聞虛擬貨幣一哥比特幣嘅最大持份者係內地投資者，家下阿爺一聲下令唔畀玩，比特幣自然首當其衝插到反艇，噚日失守4萬美元後，更一度跌穿3萬美元，一度挫逾三成，更較高位跌逾五成。而較受市場歡迎嘅以太幣及狗狗幣雙雙急挫四成。虛幣急挫引發美股隔晚曾急跌，道指一度跌近600點，尾市跌幅收窄至164，標指跌幅收窄至12點，納指盤中最多跌231點，尾市曾收復失地倒升，最終仍跌3點收市。
除咗虛幣市場動盪引發美股一度急挫，加息及收水憂慮持續，有消息指未來聯儲局嘅會議焦點將會係點樣縮減QE規模。美國收水主要係通脹持續升溫，唔少基金經理已調整組合配置，對商品、銀行、原材料、工業、英國及新興市場比重增加，目前正處於過去10年高水平，並預期聯儲局最快可能喺明年第四季加息。
虛擬貨幣跌到一仆一碌，預期今日相關股份，例如美圖(01357)呢一類投資虛幣嘅股份難逃一跌，不過科技股又未必受累，始終港股呢邊嘅重磅科技股，鮮有投資虛擬貨幣。值得一係京東(09618)派咗成績表，表現唔錯，收入勝預期，股價有機會見底回升，短線阻力為280元，但290元至300元阻力唔細，要重返300元大關可能有啲吃力。而今日另一市場焦點為騰訊(00700)業績，其業績表現將直接影響港股呢幾日走勢。
日本「國民老婆」新垣結衣宣布婚訊，有網民笑言每次日本只要有人氣藝人結婚都會重挫日股，今日日股暫時未見受太大衝擊，只係回調不足1%，即係過往日本多次有名氣藝人結婚當日日股下挫，純粹巧合，一如港股「丁蟹效應」一樣，只係咁啱得咁橋，每當有鄭少秋劇集上演股市就遇上調整其至重挫，其實兩者並無直接關連，呢啲另類預測示過得啖笑，唔需要太認真對待。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。