貨幣正常化為必經之路
7月8日，大致天晴，局部地區有驟雨，日間天氣酷熱。隔晚美股反覆向好，標指跟納指齊創收市新高，道指亦升104點。美國聯儲局公布上次議息會議紀錄，指官員們預計將繼續圍繞討論縮減量化寬鬆措施(QE)門檻上取得進展，並有多名官員認為，將提前實現開始縮減QE嘅一啲條件，官員們又強調希望將縮減QE「作為一個審慎的計劃」。市場認為貨幣寬鬆政策將維持一段較長時間，令美股略鬆一口氣。雖然美股無乜大礙，但港股ADR未能止跌，恒指再跌逾百點。
美國通脹到底係短暫抑或中長期，將影響到美國聯儲局收水及加息步伐，至今其實未有定論。而中美關係自拜登上場以嚟，未有改善之餘，甚至持續惡化，兩國未肯溝通之餘，更各自出招，喺變種病毒仍肆虐全球下，世界經濟復甦之路變得更為崎嶇難行。
港股踏入第三季以嚟，未見七翻身之餘，恒指更連破多個支持位，暫時叫做守住3月及5月份低位，但恒指被壓低至多條移動平均線之下，走勢持續疲弱。雖然全球多國央行，正為物價上漲作收水準備，但實質經濟復甦步伐仍緩慢，主要係長時間防疫，令經濟持續停擺，疫苖接種計劃喺唔同國家進度不一，第三世界國家出現疫苖不足情況，而發達國家城市，好似香港咁，疫苗接種率唔算高，主要係疫苗研發及實驗時間太短，令人唔能夠放心接種。
內地甚至有奶粉生產商，一時唔覺意爆響口，指疫苗接種對生育率或有潛在負面影響，可能導致其產品需求出現斷崖式下跌。雖然相關言論已秒速被消失，但唔少人對mRNA疫苗可能影響生育憂慮未能消除，若然全球大部份人接種疫苗後，先至發現影響生育確有其事，可能對未來人口數目增長影響深遠，甚至對整個經濟格局發展，供需結構有重大轉變。呢個情況發生與否，古天后無水晶球，發展如何真係要若干年後先有答案。
不過疫情下全球央行大開水喉，利率低無可低去到零，歐洲更甚已見負利率，貨幣寬鬆令到資產價格升值，炒股炒樓令投資者喺實體經濟低迷下，仍搵到食。不過全球低息日子已近尾聲，喺疫後經濟復甦下，通脹威脅升溫，貨幣政策正常化係必然嘅事，當利率攀升，資金成本上漲，去槓桿下世界經濟規模縮水，而股市總係先行一步，當美股睇落無敵咁強，力守高位唔多願跌之際，睇嚟缸邊友要有心理準備，隨時迎來大調整。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。