資金主導再講市盈率或錯過大牛市
1月22日，天晴，陽光普照令氣溫回升，部份地區能見度較低。美股隔晚表現反覆，道指早段創新高後曾倒跌，但最終三大指數仍報升收市，納指再創新高。美股持續嘅升勢令估值大幅上漲，愈來愈多人開始「預測」股災何時來臨，作為全球股市嘅領頭羊，美股有乜冬瓜豆腐，定引發連鎖效應，全球齊齊大冧市。
唔少人都以目前標指嘅市盈率跟科網股泡沫時嘅市盈率作比較，指22.8倍嘅標指市盈率，已相當接近2000年科網股泡沫爆破前水平，從而定下股災隨時重臨嘅結論。大家都知道古天后係股市長期大好友，若以目前標指市盈率去睇，又確係有種高處不勝寒之感，對股災將至有所憂慮係無可厚非，但股市係一個反映未來嘅地方，如果認真睇下大部份嘅標指成份股，預期市盈率平均數大約只有15至18倍，因為按去年業績推算，若然今年全球經濟能從在疫情受控後重拾正軌，穩步復甦的話，企業能回復正增長，更由於去年基數比較低，今年唔少企業增長會更可觀增長，反而市盈率並非困擾美股最大問題。
反而古天后較擔心係美國民主黨全控參眾兩院，未來公司稅率可能上升，呢個將會直接影響企業盈利表現，導致美股被拋售。不過拜登政府採取更大規模嘅財政刺激措施，喺疫情繼續肆虐美國之際，迫切需要呢啲措施去扶持經濟復甦。而華爾街亦唔多同意拜登嘅加企業稅，估計喺上任初期，至少今年上半年，拜登都會從善如流，唔會隨提出加稅。加上就業市場持續疲疲弱，目前並非一個加稅嘅合適時間。至於新任財長係鴿派女皇耶媽，佢已承諾2023年之前都會繼續維持寬鬆貨幣政策，只要市場資金保持充裕，暫時搵唔到一個理由會引發股災。
至於港股自踏入1月短短三個星期，指數由27500水平一口氣升至噚日30000水平，全靠北水源源不絕流入，噚日古天后已講咗，維持中港本市場穩定係目前國家重點戰略，而過去三年港股已完全由北水主導，外資影響力愈來愈細，只要北水資金繼續支持，港股想窮都難。或者有人會質疑，北水都總離開嘅一日，如果有咁嘅擔憂，古天后可以派派定心丸。
單係今個月內地已有超過30個公募或私募基金新成立，而每個基金規模至少500億元，而當中過千億元嘅基金數目佔大多數。而內地基金規定投資港股通不能總額不能超過基金規模五成，即係呢三十幾個基金，平均一千億計算嘅一半，足以令港股通水浸。而內地基金經理近年傾向嚟港股買一啲A股無得買，而知名度高嘅公司，好似騰訊(00700) 、美團(03690) 及小米(01810) 等，而佢哋亦喜歡買入優質股份後作長線持有，以享受呢類公司持續高增長嘅成果，呢個亦解釋到呢啲股份點解可以愈升愈有，雖然單睇市盈率，唔少中概股已去到喺過往被視為不正常，甚至係堅離地水平，但內地基金經理喺睇公司基本面同時，更注重公司增長前景，所以市盈率已經變成市夢率，只要有夢想，凡事可成真。雖然咁講法，可能會被缸邊友質疑，但事實係港股已經係一個徹底資金市，再執著市盈率高低，往往會錯過呢次嘅大牛市。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。