資金外流壓力下 港股上升動力受限
3月31日，部份時間有陽光，局部地區有驟雨，日間炎熱。美國10年期國債孳息持續向上，隔晚一度升至1.778厘，其後回順至1.72厘，目前於14個月高位。市場漸漸將對沖基金Archegos爆煲嘅焦點，重放至債息上，拜登政府通過2萬億美元刺激經濟方案後，又準備加快推出巨額基建開支計劃，更有可能提高稅收，市場擔心經濟增長步伐過快，或刺激通脹快速攀升。美股三大指數下跌，重磅科技股受壓。
不過港股ADR及夜期均向上，反映今日港股或於季結日粉飾櫥窗，略為最好。值得留意係美國10年期債息持續攀升，話就話市場已開始習慣接受，但喺美匯指數轉強，令新興市場股債面臨資金外流壓力，將限制港股上升動力，恒指喺二萬九關阻力甚大。
嚟到首季最後一個交易日，季結可能會有粉飾櫥窗，不過新經濟股呢個幾月大殺估值，唔少新經濟股，包括科技股、新能源股及新能源汽車股等等，由山頂碌到落山腰，現價較高位閒閒地唔見兩三成，更甚者高位唔見一半亦大有股在，呢批股份上面囤積唔少蟹貨，需要時間消化。明日開季又撞正復活加埋清明節長假期，呢兩日都係靜過鬼，雖然古天后呢期都建議要增加短線操作，但假日效應影響，缸邊友唔願入場，買賣兩閒，連單日波幅都收窄，想搵個位游水都難，倒不如疊埋心水放假，下星期開季再作戰。
開元私有化提供溢價變現機會
既然無乜好炒，古天后又提返一單私有化，提醒有貨嘅股東，最好接受私有化要約，把握套現機會。開元酒店(01158)主要喺中國從事中高檔連鎖酒店嘅經營及管理，舊年受疫情影響，全球旅遊產業鏈嘅經營陷入困局，雖然疫苗誔生後，疫情可望受控，但旅遊業要回復疫情前正常水平，至少仍要一兩年時間。而疫情下酒店行業受到重創，行業前景仍然唔明朗，難得開元酒店開咗條件私有化，有貨嘅股東記得喺下個月股東會投票支持私有化要約，令私有化可以順利通過。
睇返今次嘅私有化要約，每股作價18.15元，為開元酒店上市以嚟嘅歷史高位，要約人表明唔再提價亦屬正常。而呢個私有化要約價，亦較集團2019年IPO價16.5元溢價約一成，更較提出私有化前180個交易日平均價約14.21元溢價約27.7%，實在係為H股股東提供一個極具吸引力嘅溢價變現機會。
除咗要約價較市場H股現價及綜合資產淨值有溢價，而公司H股一向流通量較低，要約為H股股東大開方便之門變現，公司幾個佔H股62.73%股權嘅主要獨立股東，包括格林酒店集團 、 融通基金管理有限公司 、 GEM Holdings Ltd. 及Rex Top Global Investments Ltd. 都已同意接納H股私有化要約及支持退市。幾個大孖沙都贊成私有化，作為小股東當然要跟大隊走，下月股東會梗係投票籫成，把握落車套現好機會。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。