資金捨難取易 唔買中港股買歐美日股
5月19日，部份時間有陽光，天氣炎熱，初時局部地區有驟雨，能見度較低。美國債務問題料可周末內解決，利好市場氣氛。加上NVDA發布新款GPU，股價升半成，而Netflix公布廣告訂閱服務細節升一成，帶動科技股氣氛更熾熱，納指持續走強。雖然美股中段一度向下，但尾市再度拉升，三大指數全部向上，道指升115點；標指升39點，逼近4200短線阻力；納指則升188點，進一步向13000點出發。
歐洲股市呢兩季表現強勁，英法股市已先後破頂，德國DAX指數距離2021年高位亦不足1%，同樣係破頂在即，日本股市亦創下年高位，反映環球資金仍然充裕，而美股相對上述股市較為落後，美股頓成資金追落後對象。雖然美股近日幾番想作出較大回吐，但喺FAAMG強勢帶動，加上科企持續發布利好消息，資金喺美股追貨意欲甚高。
從歐美日股市嘅情況嚟睇，資金一直risk on，但相對虛幣市場，資金就相當保守，BTC跌穿30000大關後再失守27000支持；黃金價格跌穿2000美元，美匯指數回升至103.5。與此同時，喺美債息高企之際，科技股愈戰愈勇，令人開始懷疑資金究竟係投放避險資產，抑或繼續放膽投放高風險資產，面對目前亂象，完全係唔可以用過往嘅常理嚟解釋。
雖然美股強勢，尤其科技股氣氛熾熱，但中概股卻未見受惠，反而幾隻重磅中概股，趁出業績又嚟割韭菜，先嚟全世界無人睇好嘅京東(09618)業績平平，大額花費補貼，業績都係無增長，股價反而炒上，升7%。接住百度(09888)又係咁，條友仔吹幾句AI乜乜物物，股價績後又拉升4%。只不過呢兩股升完一下無以為繼，呢兩日陰啲陰啲，又接近回到業績前股價。輪到騰訊(00700)跟阿里(09988)未出業績先興奮，績前股價炒上，績後股價走樣，又唔知幾多韭菜被割。連股神巴菲特都想盡沽比亞迪(01122)呢隻愛股套現，全情投入日本股市，股神講明係怕咗內地企業嘅政策風險。
內地民企發展再好，好似騰訊已去到國際一級大企業級別，都被阿爺強行逼住出售手上投資項目，人家一心做大做強，阿爺就怕你強過頭，強打出頭鳥，咁嘅營商環境之下，叫資金點會放心長線投資。港股無新資金入場都唔係近期嘅事，即使留喺場內嘅少數資金，亦只係打游擊方式搵水，咁嘅情況下，港股不賭是贏錢，夾硬入場只會換嚟損手爛腳，何必捨易取難，有美股唔買要買港股咁笨實。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。