資金輪動仍關注碳中和板塊
9月6日，大致天晴，日間天氣酷熱，稍後多雲，有幾陣雨，局部地區有雷暴。上周五美國公布嘅非農就業數據又一地眼鏡碎，8月非農就業職位按月增長23.5萬個，遠低於市場預期的72.5萬及7月份修正後的增幅105.3萬。同月失業率為5.2%，按月回落0.2個百分點，符合預期。咁嘅數據出咗嚟，即係又距美國收水遠咗一步，美股上周五個別發展，納指再創收市新高，道指跌74點，標指則微跌一點。
美國公布咗呢個疲弱嘅就業數據後，幾乎可以肯定聯儲局喺9月都好難宣布縮減買債。而連登契媽保持對美股樂觀睇法，更力撐泡沫「遠得不能再遠」，重申科技革命正逼近，未來5至15年將進入從未見過的增長軌跡。而佢旗下嘅組合亦見從新投入個別科技股，未有減低風險胃納。而就業市場表現，正反映變種病毒對就業市場嘅影響，或令本來希望較快收水嘅聯儲局官員態度軟化。
嚟緊呢個星期會有多間央行議息，其中歐洲央行將評估係咪要維持以顯著較快速度買債。歐盟經濟事務專員真蒂洛尼警告，過早收緊歐元區貨幣政策會犯下「大錯」，因為主流共識係依家嘅通脹只屬暫時現象。歐美延遲收水，對歐美股市有正面影響，不過中港兩地股市未必跟歐美股市走，講到底都係資金推動。
內地方面，呢幾日嘅熱門話題，離唔開國家公布將成立北京證券交易所，明確強化落實新三板改革與貫徹專精特新概念，希望藉此解決實體經濟融資難嘅困局。北交所嘅成立，預期未會對港交所(00388)帶嚟負面影響，因為北交所定位主要係服務中小企喺內地融資問題，而非內地企業走出去渠道，應該唔會同港交所爭生意。
睇返內地喺金融與經濟維穩的情況下，A股整體走勢趨穩，有利港股氣氛，市場較明確嘅投資方向係中國經濟的產業升級，繼續支持碳中和及重點關注新能源基建與國企改革，如：光伏、風電等產業鏈中漲幅不大的細分板塊，如：輸變電、建造服務、設備、能源管理等；資金繼續喺呢幾個板塊之間輪動。指數方面，暫時仍然喺25500至26500之間窄幅上落，待適合條件出現先會有較明顯突破。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。