資金輪動非世界末日最緊要淡定
2月23日，日間溫暖，但早段能見度低，空氣質素認真麻麻。美債債息持續攀升引發憂慮，隔晚美股個別發展，表現反覆，道指早段跌207點，其後倒升27點收市；但標指連跌五日再跌30點，並創自去年2月以嚟最長跌浪；納指則創自舊年10月底以嚟最大單日跌幅。個個都擔心債息上升拖累股市，甚至連登契媽亦開口，若然債息急升，價重估將令市場出現恐慌。
股市資金輪動，由新經濟股流往傳統經濟板塊，返日資金熱炒貴賤金屬，資源股噚日急升，恒科指則大跌逾半成，兩者此起彼落，手持唔少科技股嘅缸邊友，一時忘形興奮過度喺早前高位冇食糊，仲要叻唔切加注高位再掃貨，今次回調真係貪字得個貧，甚至大嗌救命。
咁究竟呢一次由新經濟股帶動嘅升浪係咪玩完??古天后比較樂觀，喺市場流動性充裕下，港股未有耐玩完，只係資金輪流暫時轉炒舊經濟股。至於市場擔心通脹重臨真係言之過早，即使美國再放水1.9萬億美元，喺漫長嘅經濟復甦之路上，邊有咁快行到通脹呢一步。只係早前新經濟股急升，部份資金轉戰落後板塊，科技股抖氣而非玩完，咪講到世界末日咁款，自己嚇自己。
3月將會有京東(09618)旗下嘅京東物流分拆上市，重量級新股招股，資金預留認購，情況一如1月底快手(01024)招股期間，科技股捱沽司空見慣。3月兩會舉行，唔排除資金再流入炒作題材股，今日再睇睇科技股以外，仲有邊啲股份可以留意。
十四五主題離唔開內需，未來5年內地依靠內需，相關消費股料有更穩定表現，並取替進口產品，加上行業的收入波動性較少，特別是體育用品、食品飲料、本土交通運輸等典型內需板塊可看高一線。受惠於內地消費升級及經濟復甦，體育用品股龍頭李寧(02331)及安踏(02020)，以及食品股蒙牛集團(02319)中長線有望借助其領先優勢及產業政策消息繼續跑贏大市，可趁調整收集。而古天后之前曾推介嘅運動代理品牌滔搏(06110)估值相對吸引，回落至12元樓下亦可留意。
國家能源局早於去年底表示，預計光伏發電新增裝機規模遠高於「十三五」。不過，近日新能源股出現獲利回吐，包括風電股龍源電力(00916)、金風科技(02208)，以及光伏股信義光能(00968)及信義能源(03868)，暫時相關股份可待喘定再吸納。
除咗推動新能源發展之外，針對汽車產業，內地當局近年確立支持發展新能源汽車產業嘅大方向。今年為新能源汽車產業由成長期過渡至成熟期，相關股份可望繼續跑贏，包括龍頭嫌染藍大熱嘅比亞迪股份(01211)，近日與科網巨頭展開智能車及自動駕駛合作嘅吉利汽車(00175)及長汽(02333)等有機會再破頂。至於零部件股份，可跟隨北水資金配置耐世特(01316)。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。