跟北水步伐走 一定唔使愁
2月18日，天晴乾燥，早晚清涼，氣溫較早幾日略有回落，早出晚歸要注意保暖。美股隔晚個別發展，道指再創收市新高，升90點；標指微跌1點；納指則跌82點。股神巴菲特旗下巴郡減持蘋果公司，拖累其股價隔晚跌1.76%，不過減持後，巴郡仍持有8.871億股蘋果公司股份，嚟到呢啲位套現部份持倉鎖定盈利都係合情合理。值得留意係巴郡近日頻頻大手掃入傳統股如石油股及電訊股，反映股神睇好美國經濟復甦，帶動傳統經濟股做好。
市場開始將焦點重新放喺經濟復甦上，不過經濟復甦或引發全球通脹，呢個隨時係美股甚至全球股市回調藉口，但只要實體經濟漸漸回復，回調後將會迎來更大升浪。美國10年期國債孳息率過去三個交易日收高，周三曾攀升至1.331%。有分析指下一輪財政刺激方案或推動債券孳息率全線上揚，為通脹重臨埋下伏線。雖然美股有下調風險，但目前情況唔可以跟2000年科網泡沫相提並論，主要係美國經濟正步出衰退，而非由好轉壞，加上聯儲局已承諾維持寛鬆貨幣政策一段時間，即使美股有機會出現一至兩成回調幅度，但演變成股災暴跌可能情暫時微乎其微。
至於港股今日北水回歸，雖然尋日恒指一度回軟跌逾200點，下試30500水平，但並未見完全回補周二形成嘅上升裂口，反映投資者並未急於沽貨離場，目前市場氣氛仍然熾熱，若然今日北水回歸，A股復市開紅盤並高收，或帶動港股進一步走高，短線恒指阻力為31500點。
港股能否保持升勢，取決於北水會否持續持貨，睇返北水喺1月份已錄得逾3100億元淨流入，創單月新高紀錄，短短一個月已逼近舊年全年淨買入規模一半。唔少大行估計今年北水淨流入港股金額可超過10000億元，即1月份只係買入不足全年金額三份之一，只要跟住北水步伐，自然可以旗開得勝。要跟到北水步伐，自然要知北水口味，觀乎北水過去一年嘅喜惡，國際知名，以及貼近生活嘅大品牌公司，即係騰訊(00700)及美團(03690)正正係北水鍾愛嘅類型。另一類係國策支持嘅受惠股份，如新能源股包括進軍電動車嘅車企，及光伏或潔淨能源股等。最後一類對北水甚具吸引力嘅股份，當然係內地股市稀缺板塊，好似思摩爾(06969)及泡泡瑪特(09992)呢一類股份，前者自獲納入港股通後，升幅驚人，後者暫未獲納入港股通，一旦獲納入，好大機會成為北水新寵。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。