跟隨北水步伐 增加短線操作
8月27日，多雲，間中有驟雨及狂風雷暴，早上部份地區雨勢頗大，午間短暫時間有陽光。經濟數據反映美國經濟持續向好，唔少聯儲局支持開始收水，有建議傾向以八個月時間逐步縮減QE計劃，即係盡快停止買債；同時預期明年開始加息。雖然變種病毒令疫情未有退減跡象，但未有對經濟前景及就業增長帶來風險；而需求方面亦未見短缺問題，極度寛鬆貨幣政策唔再適合。道指收報35213點，跌192點；標指收報4470點，跌26點；納指收報14945點，跌96點。
聯儲局提早收水呼聲甚高，市場已有預測，指美股喺貨幣政策逐步收緊下，美股由呢段時間至10月期指，可能下跌半成至一成，最壞嘅情況下，標指更有可能下試200日平均線，低見4000大關。刺激措施及經濟增長見頂，以及美國債息上升，高處不勝寒嘅美股將面臨震盪。
投資者雖然擔心美股隨時高位回落大震盪，甚至再有美股爆煲股災之說再傳出，但美股繼續維持強勢。相對港股弱勢持續，反彈乏力，即使上周見咗年內低位後反彈，但本周反彈缺乏承接力，成交未能配合反彈，明顯港股投資者信心欠奉。下周一期指結算，即管睇睇結算後，港股能否扭轉目前劣勢，但古天后唔太樂觀，暫時港股表現仍然反覆，睇住幾隻龍頭科技股嘅表現，大概估到港股短期唔似有運行。
目前困擾港股，仍然係內地監管問題，近期更提倡「共同富裕」，令投資者更擔心內地將加強執行反壟斷等措施。不過為免讓外資卻步，阿爺周四派出中央財經委員會辦公室副主任韓文秀再度嘗試派定心丸，直言「民營企業和民營企業家是自己人」、唔搞「殺富濟貧」，又話要畀平台經濟於參與國際合作及競爭中發揮積極作用。不過呢枝強心針並未能提振中港兩地股市，恒指噚日再跌438點，科技股再度走弱。
對於阿爺嘅共富理念，唔少科企都自己自覺配合，騰訊(00700)跟拼多多即分別豪擲500億元人民幣及100億元人民幣發展公益。對於呢啲舉動，又睇睇阿爺發言人講乜，韓文秀強調唔搞「殺富濟貧」，「第三次分配是在自願基礎上的，不是強制」，國家稅收政策要給予適當激勵，通過慈善捐贈等方式，起到改善分配結構嘅補充作用，並要鼓勵勤勞及創新致富。
不過有分析指「資本在中國已被政治化」，市場一般認為增長型嘅中資股，捲入政治及監管風波後就走樣，唔少包括科企在內嘅中資股估值已被永久腰斬，唔會復原。呢啲分析正正係已撤出港股嘅外資，一段時間唔會重返港股市場，呢個亦係港股近日成交縮水，只盼北水能再度活躍，令港股有翻身嘅一日。可惜暫時未見北水大量流入，北水操作傾向更加短線，唯有跟隨北水步伐。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。